Usa ka siyudad nga lakip niadtong gisaway ni Jesus ug nahimutang sa A nga tumoy sa Dagat sa Galilea. (Mat 11:21; HULAGWAY, Tomo 2, p. 739) Sagad nga gituohan sa mga eskolar nga kini mao ang Khirbet Kerazeh (Korazim), mga 3 km (2 mi) lamang sa AAK sa gituohang dapit sa karaang Capernaum (Mat 11:23), ang siyudad nga lagmit gihimo ni Jesus nga sukaranan sa iyang mga kalihokan sa panahon sa iyang dakong ministeryo sa Galilea nga mikabat ug kapin sa duha ka tuig. Si Jesus nagpahayag sa umaabot nga ‘kaalaotan’ sa Hudiyong mga molupyo sa Corasin kinsa, sa maong yugto, maoy mga saksi sa “gamhanang mga buhat” nga makapatukmod unta sa mga pagano sa Tiro ug Sidon nga maghinulsol, bisan pa niana sila wala molihok sumala sa mensahe ni Jesus. Human niini, sa tinghunlak sa 32 K.P., sa dihang gipadala ang 70 ka tinun-an sa panahon sa iyang ulahing ministeryo sa Judea, gilakbitan paghisgot ni Jesus ang dili-mahinulsolong tinamdan sa Corasin, lagmit aron ipasiugda ang dakong kaalaotan nga maagoman niadtong dili-masanongong mga siyudad nga batok niini ang iyang mga tinun-an ‘magpapha sa abog’ gikan sa ilang mga tiil.​—Luc 10:10-16.