Ang kaulohan nga siyudad sa AS nga tumoy sa usa ka pulo nga ginganlan usab ug Cos. Nahimutang kini atbang sa HK nga baybayon sa Asia Minor. Ang maayong nahimutangan sa Cos maoy nakaingon sa kahinungdanon niini sa negosyo ug sa panakayan sa unang panahon.

Bisan tuod si apostol Pablo lagmit milawig saylo niining siyudara sa dihang mipanaw gikan sa Efeso paingon sa Cesarea sa pagkatapos sa iyang ikaduhang misyonaryong panaw niadtong mga 52 K.P. (Buh 18:​21, 22), sa pagkatapos lamang sa iyang ikatulong panaw, mga upat ka tuig sa ulahi, nga ang pulo gihisgotan sa ngalan niini diha sa Mga Buhat. Human ‘mobiya’ si Pablo sa mga ansiyano sa Efeso nga iyang gipakigsultihan didto sa Mileto (Buh 20:​17, 36-38), ang barko nga gisakyan niya ug ni Lucas ‘mideretso paglawig,’ buot ingnon, kini milawig nga buyon sa hangin, nga wala motipas, ug maayo ang panahon, hangtod nga kini “nahiabot sa Cos,” usa ka panaw nga mga 75 km (47 mi) paingon sa baybayon. Gibanabana sa ubang mga komentarista nga pinaagi sa naandang paghuros sa hangin nga gikan sa AK sa Aegean, ang maong gilay-on mahimong lawigon sulod sa mga unom ka oras, nga sumala sa gipaila ni Lucas, ang barko nga gisakyan ni Pablo moabot sa Cos sa mismong adlaw sa paggikan niini sa Mileto. Lagmit nga kini nga barko nagpalabay sa kagabhion nga nakaangkla atbang sa S nga baybayon sa Cos ug nakaabot sa Rodas “pagkasunod nga adlaw,” human kini mobiya sa pagkabuntag sa panaw nga mokabat ug mga 120 km (75 mi).​—Buh 21:1.

Ang pulo sa Cos nabaniog nga dugay nang usa ka Hudiyohanong sentro sa Aegean. Kini maoy usa ka gawasnon nga Romanhong estado sa lalawigan sa Asia ug, sumala kang Tacitus, kini wala na pabuhisa ni Claudio niadtong 53 K.P.