[Kang (Iya ni) Cus (Etiopia)].

Ang terminong “Cusihanon” mahimong magtumong sa mga molupyo sa yuta sa Cus sa Aprika o sa pipila ka kahimtang kini mahimong magtumong sa mga tawong nagpuyo sa Peninsula sa Arabia. Kining ulahi nga gihisgotan lagmit nga mapadapat sa asawa ni Moises nga si Zipora. (Ex 18:1-5; Num 12:1) Si Zipora maoy usa ka Kenihanon kansang kagikan dili matino. (Gen 15:​18, 19; Huk 4:11) Ang mga pulong sa 2 Cronicas 21:16 nga “didto sa kiliran sa mga Etiopianhon [Cusihanon]” ingong nagtumong sa pipila ka Arabo mahimong magpasabot usab nga “ubos sa pagkontrolar sa mga Etiopianhon,” ug kini lagmit nagpakita sa usa ka pasukaranan sa pagpadapat sa ngalang “Cusihanon” ngadto sa mga tawo nga wala maggikan kang Cus. Ang ubay-ubayng mga anak nga lalaki ni Cus gituohang mipuyo sa Peninsula sa Arabia.​—Tan-awa ang HAVILA Num. 3; SABTA.

Apan, sa panguna ang “Cusihanon” nagtumong sa mga Aprikano nga nagpuyo sa rehiyon nga gitawag kaniadto nga Etiopia. Dugang pa kang “Zera nga Etiopianhon [Cusihanon]” ug kang “Tirhaka nga hari sa Etiopia” (2Cr 14:9; 2Ha 19:9), ang ubang Cusihanon nga gihisgotan sa Bibliya mao si Ebed-melek (Jer 38:7-12; 39:16-18), ang Etiopianhong eunuko nga nahimong kinabig sa  Kristiyanidad, ug ang rayna nga iyang gialagaran, si Candace. (Buh 8:​26, 27) Ang heneral nga si Joab mipilig wala-hinganli nga Cusihanong magdadagan (gitawag ug Cusi sa KJ) inay sa usa ka Israelinhon aron ibalita kang David ang kapildihan ug kamatayon sa iyang anak nga si Absalom.​—2Sa 18:19-32; tan-awa ang CUS Num. 2.