Ang Hebreohanong termino nga keliʹ, nga usahay gihubad nga “dad-onon” ug “bagahe,” halapad ug kapadapatan. Ang paninugdang diwa sa Hebreohanong pulong lagmit nagtumong sa “butang nga gisudlan; sudlanan.”​—Tan-awa ang HINAGIBAN, ARMADURA.

Ang kasundalohan nga magkampo, mga magpapanaw, kadtong adunay panagkatigom nga halayo sa ilang mga balay, ug uban pa, magdalag kinahanglanong mga galamiton ingong dad-onon, o bagahe. (1Sa 10:​21, 22; 17:22; 25:​9-13) Si David mihimog regulasyon sa Israel nga ang mga tawo nga mabilin aron sa pagbantay sa mga bagahe sa panahon sa pagpakiggubat angayng makabaton ug samang bahin sa mga inagaw sa kadaogan nga mabatonan sa mga tawong nakig-away.​—1Sa 30:21-25.

Ang Ehipto gisultihan sa pagpangandam sa iyang kaugalingon alang sa pagkadestiyero pinaagi  sa pag-andam ug “bagahe alang sa pagkadestiyero,” kay tino ang iyang pagkapukan ngadto sa Babilonya, ingon sa gitagna sa manalagnang si Jeremias. (Jer 46:​13, 19) Sa adlawng dako, ingong bahin sa simbolikong paglarawan sa umaabot nga pagkadestiyero sa Jerusalem ngadto sa Babilonya, si Ezequiel nagdalag “mga dad-onon alang sa pagkadestiyero” gikan sa iyang balay.​—Eze 12:1-4, 7-11.