[lagmit, Nagbitaybitay].

Usa ka babaye nga nagpuyo sa bul-oganang walog sa Sorek. Si Delila gipaila sa asoy sa Bibliya sa hinapos sa 20-ka-tuig nga pagkamaghuhukom ni Samson ingong iyang hinigugma.​—Huk 16:31.

Ang magkaabin nga mga ginoo sa mga Filistehanon, nga buot gayod mopatay kang Samson, sa tagsatagsa nagtanyag kang Delila ug 1,100 ka pirasong plata (kon mga siklo, $2,422) aron itug-an kanila kon diin naggikan ang talagsaong kusog ni Samson. Siya mitabang kanila pinaagi sa pagsukitsukit kang Samson kon unsay makapawala sa iyang kusog. Sa matag higayon nga si Samson motubag, isulti kini ni Delila ngadto sa mga Filistehanon ug tagoan niya sulod sa iyang balay ang Filistehanong mga manggugubat kinsa andam nga mopahimulos sa pagdakop kang Samson sa dihang siya mawad-an na sa iyang kusog. Human si Samson molimod sa tulo ka higayon, si Delila nagpadayon sa pagsamok kaniya ug “iyang gipugos siya pinaagi sa iyang mga pulong sa tanang panahon ug nagsigeg aghat kaniya, [nga tungod niana] ang iyang kalag nawad-ag pailob nga halos mamatay na.” Human niana iyang gitug-anan siya bahin sa iyang pagka-Nazareo ug nga wala pay labaha nga midapat sa iyang ulo. Kay nakatino nga niining panahona gitug-anan na siya sa tinuod, siya nagpatawag sa magkaabin nga mga ginoo sa mga Filistehanon, ug sila miadto aron dad-on ang salapi ngadto kaniya. Samtang si Samson nakatulog diha sa tuhod ni Delila, giputol sa usa ka tig-alagad ang pito ka sinalapid nga buhok sa iyang ulo. Sa  pagkahigmata, nabatyagan ni Samson nga niadtong tungora ang iyang hinatag-sa-Diyos nga kusog nawala na. Gigunitan siya sa mga nagtagong mga Filistehanon, ilang gibutaan siya, ug gidala siya ingong binilanggo. (Huk 16:4-21) Si Delila wala na hisgoti diha sa asoy sa Bibliya.

Wala isulti sa Bibliya nga dihay seksuwal nga relasyon nga nahitabo tali kang Delila ug Samson o nga si Delila usa ka pampam. Ang pampam nga gihisgotan sa Maghuhukom 16:​1, 2 dili mao si Delila. Kini nga pampam nagpuyo sa Gaza, samtang si Delila nagpuyo sa bul-oganang walog sa Sorek. Labot pa, ang mosunod nga ebidensiya nagpakita nga si Delila lagmit usa ka Israelinhon, dili usa ka Filistehanon: Sa dihang ang magkaabin nga mga ginoo nagbungat sa ilang tanyag, gihimo kadto pinasukad sa dakong kantidad sa salapi ug dili tungod sa patriotismo.​—Huk 16:5.