[Kang (Iya ni) Demeter [Gregong diyosa sa agrikultura]].

1. Usa ka platero sa siyudad sa Efeso sa Asia Minor nga maoy nagsugnib ug kagubot batok kang apostol Pablo ug sa iyang mga kauban sa hinapos nga pag-estar ni Pablo sa Efeso tali sa duha ug tulo ka tuig (mga 53-55 K.P.), sa panahon sa iyang ikatulong misyonaryong panaw. Ang pagsangyaw ni Pablo nagmalamposon sanglit daghan ang mitalikod gikan sa mga buhat sa salamangka ug nagsunog sa ilang mga basahon. Si Demetrio, nga nagdumalag mauswagong negosyo sa paghimog plata nga mga ampoanan alang sa diyosa nga si Artemis, nagsulsol sa mga artesano ug sa uban pa kay nahadlok nga basin siya mawad-an ug kinitaan tungod sa kalamposan ni Pablo sa paghimog mga tinun-an ni Kristo. Pinaagi sa iyang duha ka pangatarongan, ang posibleng pagkawala sa negosyo ug ang kapeligrohan nga mawad-an ug dungog ang templo ni Artemis, siya milampos sa pagpahinabog kaguliyang sa tibuok siyudad.

Human sa mga duha ka oras, napahunong ra sa kalihim sa siyudad ang kaguliyang; iyang giingon nga kon si Demetrio ug ang mga artesano may sumbong batok kang Pablo ug sa iyang mga kauban, may mga korte nga mohusay sa maong butang sa legal nga paagi ug nga tungod niining masamok nga demonstrasyon ang siyudad mahimong ikasumbong sa Romanhong kagamhanan ug pag-alsa batok sa pamunoan. Dayon nahilom ang panon sa katawhan, gibuhian ang mga isigkamagbubuhat ni Pablo ug sila namiya sa teatro diin didto nahitabo ang makauulaw nga kagubot. Wala madugay human niadto si Pablo mipanaw paingon sa Macedonia.​—Buh 19:​18, 19, 23-41; 20:1.

2. Usa ka Kristohanon nga gidayeg ni apostol Juan diha sa iyang usa ka sulat ngadto kang Gayo, sa mga 98 K.P. Tingali si Demetrio ang nagdala sa sulat ngadto kang Gayo. Ang rekomendasyon ni Juan bahin kang Demetrio tingali maoy pagdasig kang Gayo nga ipakita ang pagkamaabiabihon ngadto kang Demetrio, sanglit mopatim-aw nga maoy kostumbre sa mga kongregasyon ang pagtaganag pagkaon ug puy-anan sa matinumanong mga igsoon nga mipanaw alang sa maayong balita.​—3Ju 1, 12.