Usa ka “siyudad sa Licaonia” sa Asia Minor nga giduaw mismo ni apostol Pablo sa duha o tingali sa tulo ka higayon.

Lagmit sa wala pa ang tingtugnaw sa 47-48 K.P., panahon sa iyang unang misyonaryong panaw, si Pablo nakaabot sa Derbe human sa grabe nga pagbato didto sa kasikbit nga Listra. Sa Derbe, siya ug si Bernabe ‘nagpahayag sa maayong balita’ ug nakahimog “ubay-ubayng mga tinun-an,” tingali naglakip kang “Gayo nga taga-Derbe,” kinsa gihisgotan sa ulahi ingong kauban sa panaw sa apostol. Bisan tuod nga ang sekular nga kasaysayan nagpakita nga human sa 41 K.P. ang Derbe mao ang  siyudad nga anaa sa kinatumyang bahin sa sidlakan sa politikanhong lalawigan sa Galacia, ang paghubit ni Lucas niini ingong usa ka “siyudad sa Licaonia” dinhi niini nga asoy mopatim-awng maylabot sa kon diin kini nahimutang o kon unsay kultura niini. (Buh 14:​6, 19-21; 20:4) Mga bulan sa ulahi, human sa konsilyo sa Jerusalem bahin sa pagtuli (mga 49 K.P.), ug samtang anaa sa iyang ikaduhang panaw, si Pablo mibalik sa Derbe. (Buh 15:36; 16:1) Bisan tuod wala hinganli, lagmit nga si Pablo mihapit usab sa Derbe sa iyang ikatulong misyonaryong panaw sa dihang iyang gipalig-on ang mga tinun-an sa “kayutaan sa Galacia.” (Buh 18:23) Walay rekord nga si Pablo gilutos didto sa Derbe, ug wala niya hisgoti ang maong siyudad daghang tuig sa ulahi sa dihang siya miasoy sa iyang mga pag-antos sa ubang mga dapit nga kasikbit niini.​—2Ti 3:11.

Ang Derbe mao karon ang Kerti Hüyük nga 21 km (13 mi) sa AAS sa Karaman (karaang Laranda) ug mga 100 km (62 mi) sa HS sa Konya (karaang Iconio). Kon gilakip ba paghisgot ang Derbe sa sulat ni Pablo “nganha sa mga kongregasyon sa Galacia,” tan-awa ang GALACIA, SULAT NGADTO SA MGA TAGA-.​—Gal 1:2.