Usa ka magilakon nga bililhong bato, ang kinagahian nga kinaiyanhong mineral nga nakaplagan sukad masukad ug lakip sa labing bililhon nga mga mutya. Bisan tuod kasagaran sa mga diamante walay kolor, ang pipila medyo dalag, berde, pula, kape, asul, ug itom. Ang kadaghanan sa wala pa matabas nga mga diamante maoy otso-kantos nga tin-aw o sihagon nga mga kristal ug halos lunlon nga karbon. Gituohan nga ang mga diamante naporma sa dugay na kaayong panahon sa dihang ang karbon sa yuta nailalom sa grabeng presyur ug kainit. Ang unang mga diamante nakaplagan diha sa mga salog sa mga sapa, apan sa modernong mga panahon kini sagad gimina gikan sa mga bato ilalom sa yuta.

Ang Hebreohanong pulong nga sha·mirʹ (nga kaduha gihubad nga “diamante,” kausa ingong “batong ismeril” sa NW) dayag nga nalangkit sa Akadianhong pulong nga ashmur, nga nagkahulogang “ismeril.” Ang pipila nagtuo nga ang sha·mirʹ mahimong mapadapat sa usa ka gahi kaayong mineral nga mahimong magtumong sa diamante o sa daghang gahi kaayong mga substansiya, sama sa corundum ug ismeril.

Si Jehova naghisgot sa mga diamante nga gigamit sa pagkudlit o pagkulit sa gahing mga materyales sa dihang miingon: “Ang sala sa Juda gisulat pinaagi sa usa ka dagang nga puthaw. Pinaagi sa tumoy sa diamante kini gikulit diha sa papan sa ilang kasingkasing, ug diha sa mga sungay sa ilang mga halaran.” (Jer 17:​1, 2) Ang balay sa Israel usab nahimong gahian ug tig-ag kasingkasing. Busa, si Jehova miingon kang Ezequiel: “Tan-awa! Gihimo ko ang imong nawong nga ingon kagahi sa ilang mga nawong ug ang imong agtang nga ingon kagahi sa ilang mga agtang. Gihimo ko ang imong agtang nga sama sa usa ka diamante, nga magahi pa kay sa santik.” (Eze 3:7-9) Sa susama, tungod sa pagkagahian sa mga Hudiyo, si Jehova nagpahayag pinaagi kang Zacarias: “Ang ilang kasingkasing gihimo nilang ingon sa usa ka batong ismeril [Heb., sha·mirʹ] aron dili makatuman sa balaod ug sa mga pulong nga gipadala ni Jehova sa mga panon pinaagi sa iyang espiritu, pinaagi sa unang mga manalagna.”​—Zac 7:12; tan-awa ang MUTYA UG BILILHONG BATO.