Usa ka dapit nga gihisgotan ni Ezequiel (6:14) sa dihang iyang gitala ang tagna ni Jehova labot sa kalaglagan nga modangat sa yuta sa Israel ingong balos tungod sa idolatroso nga pagsimba niini. Walay karaang dapit nga nahibaloang nagbaton niining ngalana, ug busa, kadaghanan sa modernong mga eskolar nagtuo nga ang magkokopya nasayop sa pagsulat sa “Dibla” inay nga “Ribla,” sanglit ang unang Hebreohanong letra alang sa “R” (ר) dali kaayong masaypan ingong ang Hebreohanong letra alang sa “D” (ד). Kon kini mao ang nahitabo, lagmit nga kini mao ang Ribla sa Bibliya (ang mga kagun-oban duol sa modernong Ribleh) diha sa Suba sa Orontes, “sa yuta sa Hamat” (2Ha 23:33), ug “ang kamingawan paingon sa Dibla [Ribla]” lagmit nagtumong sa batoon, lapad kaayong patag sa Desyerto sa Sirya nga nahimutang dapit sa H ug sa HS sa Ribla. Apan, ang pipila ka maghuhubad naghubad sa mga pulong ni Ezequiel nga “gikan sa kamingawan paingon sa Ribla.” (RS) Sumala niini nga hubad, lagmit kini nagkahulogan nga ang paghukom ni Jehova modangat gikan “sa  kamingawan,” ang gituohang habagatan nga utlanan sa Yutang Saad (Ex 23:31), hangtod sa rehiyon sa “Hamat” (gihawasan sa Ribla) sa halayong amihanan. (1Ha 8:65) Nan, ang paggamit ni Ezequiel sa maong prase maoy katumbas sa mas iladong prase nga “gikan sa Dan hangtod sa Beer-seba.”​—Huk 20:1; tan-awa ang RIBLA Num. 2.