Ang halos lingin nga dal-as nga niana moagos ang Suba sa Jordan. Naglakip kini sa ubos nga bahin sa Walog sa Jordan, ingon sa makita sa dihang gihisgotan ang “Distrito sa Jordan” maylabot sa mga kalihokan ni Solomon sa paghulmag tumbaga taliwala sa Sucot ug Zaretan. (1Ha 7:46; 2Cr 4:17; itandi ang 2Sa 18:23.) Apan, ang “Distrito” daw miabot usab hangtod sa habagatang tumoy sa Patayng Dagat diin nahimutang ang “mga siyudad sa Distrito.” (Gen 13:10-12) Busa dili lamang kay nag-okupar kini sa patag nga walog sa Jerico kondili nakaabot pa hangtod sa Zoar, ang siyudad diin didto mikalagiw si Lot ug ang iyang mga anak nga babaye.​—Gen 19:17-25; Deu 34:3.

Ang panukiduki nga gihimo sa habagatang tumoy sa Patayng Dagat nagpakita nga ang dakong bahin sa yuta ubos sa naglawis nga yuta nga gitawag ug Lisan natabonan sa katubigan sa Dagat. Daghang eskolar ang nagtuo nga ang “mga siyudad sa Distrito” nalusbog sa tubig niini nga rehiyon. Kini kanhi maoy “maayong pagkatubig” ug sama sa “tanaman ni Jehova.” (Gen 13:10) Dili lamang kay kini ang kahimtang kanhi sa rehiyon sa A sa Patayng Dagat, diin karong adlawa ang Kapatagan sa Moab ug ang tubigan nga dapit sa Jerico na lamang ang nagpabiling tabunok, kondili ingon usab niini ang habagatang bahin sa Distrito. Bisan karong adlawa ang patag nga kasikbit sa Lisan gihubit ingong “nagpabiling tubigan nga dapit” diin mahimong itanom ang sebada, trigo, datiles, ug mga paras. Ang rehiyon sa binanlas nga yuta sa Suba sa Zered, nga nagaagos ngadto sa habagatang tumoy sa Patayng Dagat gitawag usab ug “tabunok nga tubigang dapit.”