[lagmit, Mabalak-on; Nahadlok].

Usa ka Edomhanon nga nag-alagad ingong pangulong magbalantay sa kahayopan ni Haring Saul, usa ka sinaligang katungdanan sa pagdumala. (1Sa 21:7; 22:9) Dayag nga si Doeg maoy usa ka kinabig. Tungod kay “gihawiran sa atubangan ni Jehova” didto sa Nob, lagmit tungod sa usa ka panaad, kahugawan, o gikatahapan nga sanla, nakita ni Doeg ang Hataas nga Saserdoteng si Ahimelek nga naghatag kang David sa pasundayag nga tinapay ug sa espada ni Goliat. Sa ulahi, sa dihang namulong si Saul sa iyang mga alagad ug gipahayag nga siya nagtuong sila nagkunsabo batok kaniya, gibutyag ni Doeg kon unsay iyang nakita didto sa Nob. Human ipatawag ang hataas nga saserdote ug ang ubang mga saserdote sa Nob ug human mapangutana si Ahimelek, gisugo ni Saul ang mga magdadagan sa pagpatay sa mga saserdote. Sa dihang sila midumili, si Doeg, ubos sa sugo ni Saul, wala magpanagana sa pagpatay sa tanang 85 ka saserdote. Human niining daotang buhat, ang Nob gilaglag ni Doeg, nga gipamatay ang tanang mga molupyo niini, batan-on ug tigulang, maingon man ang kahayopan.​—1Sa 22:6-20.

Ingon sa gipakita sa superskripsiyon sa Salmo 52, si David misulat bahin kang Doeg: “Mga kadaotan ang ginalaraw sa imong dila, binaid sama sa labaha, nga nagabuhat nga malimbongon. Gihigugma mo ang daotan labaw kay sa maayo, ang kabakakan labaw kay sa pagsulti sa pagkamatarong. Gihigugma mo ang tanang nagadaot nga mga pulong, Oh dila nga malimbongon.”​—Sal 52:2-4.