Usa ka siyudad nga gihisgotan diha sa duha ka asoy sa Bibliya. Ang Dotan gituohan karon nga mao ang Tell Dothan (Tel Dotan), nga nahimutang diha sa usa ka gamayng samag dal-as nga patag ibabaw sa usa ka bungtod nga anaa taliwala sa kabungtoran sa Samaria ug sa Kabukiran sa Carmelo, 16 km (10 mi) sa AAS sa Samaria.​—HULAGWAY, Tomo 1, p. 950.

Nakaplagan sa batan-ong si Jose ang iyang mga igsoong lalaki ug ang ilang panon sa kahayopan didto “sa Dotan.” Gituohan nga lagmit sila didto sa A nianang siyudara, sa sibsibanan nga niana milatas ang dalan nga nagdugtong sa Gilead (S sa Jordan) ug sa kabaybayonan sa Mediteranyo ug sa Ehipto. Lagmit kini ang ruta nga gisubay sa “nagapanaw nga panon sa mga Ismaelinhon” nga nagpalit kang Jose.​—Gen 37:17-36.

Kasiglohan sa ulahi ang hari sa Sirya nagpadala ug dakong panon sa kasundalohan ngadto sa Dotan aron sa pagdakop kang Eliseo. Dinhi ang nahadlok nga tig-alagad sa manalagna milagrosong  nakakita sa nagkalayong mga karong iggugubat sa Diyos diha sa “bukirong rehiyon . . . nga naglibot kang Eliseo,” nga mao, lagmit sa mao ra usab nga bungtod nga nahimutangan sa Dotan o kaha sa kasikbit nga mga bungtod sa S, H, ug sa K sa Dotan. (2Ha 6:11-17) Ang mga Siryanhon, sa paglikos sa siyudad, lagmit mipuwesto usab niining naglibot nga kabungtoran, nga gikan niana sila “milugsong” sa dihang si Eliseo migula sa siyudad aron sugaton sila. Apan, ang kaawayng kasundalohan nahimong inutil sa dihang sila milagrosong gihampak pinaagi sa usa ka matang sa pagkabuta, ug lagmit gigamit ni Jehova ang mga manulonda sa paghimo niini.​—2Ha 6:​18, 19; itandi ang Gen 19:​1, 10, 11.