Gikan sa Gregong pulong nga draʹkon, nga naghulagway sa usa ka makalilisang nga mangtas, usa ka samag-halas nga manunukob. Kini makaplagan sa 13 ka higayon diha sa Bibliya apan diha lamang sa simboliko kaayong basahon sa Pinadayag, ug kini naghawas kang Satanas nga Yawa. Siya ang “dakong dragon nga ang bulok samag kalayo, nga may pito ka ulo ug napulo ka sungay,” nga may ikog nga nagbutad sa “ikatulo ka bahin sa mga bituon sa langit” sunod kaniya, ug kini sila unang nadaldal sa pagmateryalisar ingong mga tawo sa wala pa ang Lunop ug dayon nahimong mga demonyo. (Pin 12:​3, 4; Jud 6) Uban niini nga mga demonyo, si Satanas nga Dragon gitambog gikan sa langit nganhi sa yuta. “Busa gitambog ang dakong dragon, ang orihinal nga halas, ang usa nga gitawag Yawa ug Satanas.” (Pin 12:7-9) Niining gipaubos nga kahimtang iyang gilutos ang nahibilin sa “babaye” sa Diyos, kadtong may “buluhaton sa pagpamatuod.”​—Pin 12:13-17.

Ang samag-dragon nga si Satanas mao usab ang naghatag ug gahom ug dakong awtoridad ngadto sa simbolikong mapintas nga mananap nga may pito ka ulo ug napulo ka sungay, ug sa baylo, siya gisimba sa mga katawhan sa “tibuok nga yuta.” (Pin 13:2-4) Diha sa panan-awon nakita usab ni Juan nga ang nagkalakala nga samag-baki nga “mga pahayag nga inspirado sa mga demonyo,” nga nangadto sa “mga hari sa tibuok gipuy-ang yuta,” naggikan sa baba sa Dragon, o ni Satanas, ingon man usab gikan sa mga baba sa “mapintas nga mananap” ug sa “mini nga manalagna.” Kini mosangpot sa pagkatigom niini nga mga magmamando ug sa ilang mga tigpaluyo “ngadto sa gubat sa dakong adlaw sa Diyos nga Labing Gamhanan . . . sa dapit nga gitawag sa Hebreohanon ug Har–Magedon [Armagedon].” (Pin 16:13-16) Human niining kinadak-an sa tanang gubat, ang “manulonda” nga mokunsad gikan sa langit modakop sa “dragon, ang orihinal nga halas, nga mao ang Yawa ug Satanas,” ug gaposon siya ug itanggong sa kahiladman sulod sa usa ka libo ka tuig.​—Pin 20:1-3; tan-awa ang SATANAS.