Ang ikatulo ug kinamanghorang anak nga babaye ni Herodes Agripa I nga natawo sa mga 38 K.P.; igsoong babaye ni Agripa II, Bernice, ug Mariamne III. Ang ngalan sa iyang inahan maoy Cypros. Sa wala pa siya mag-edad ug sayis anyos, gihikay na ang iyang kaminyoon ngadto kang prinsipe Epiphanes sa Commagene, apan wala kini mahinayon tungod kay ang pamanhonon unta midumili sa pagdawat sa Judaismo. Ang usa ka hari sa Sirya, si Azizus sa Emesa, misugot sa kondisyon nga magpatuli, ug si Drusila nahimo niyang asawa sa edad nga 14. Tungod sa kanunayng pagdagmal ni Azizus kang Drusila ug kay naglagot nga siya gikasinahan sa iyang dili kaayo maanyag nga igsoong babaye nga si Bernice, si Drusila dali ra kaayong naaghat sa pagdiborsiyo kang Azizus nga sukwahi sa Hudiyohanong balaod ug nakigminyo kang Gobernador Felix niadtong mga 54 K.P. Lagmit didto siya sa dihang ang binilanggong si Pablo “namulong bahin sa pagkamatarong ug pagpugong-sa-kaugalingon ug sa paghukom nga moabot,” nga maoy labing nakapasamok nga mga ulohan alang kang Gobernador Felix. Human sa duha ka tuig, sa dihang gitugyan ni Felix ang pagkagobernador ngadto kang Festo, iyang gibilin si Pablo nga ginapos aron “makabatog pabor sa mga Hudiyo,” nga gihunahuna sa uban nga gibuhat aron pahimut-an ang iyang batan-ong asawa “kinsa usa ka Hudiyo.” (Buh 24:24-27) Ang anak nga lalaki ni Drusila pinaagi kang Felix maoy laing Agripa, nga gitahong namatay sa kusog nga pagbuto sa Mount Vesuvius niadtong 79 K.P.