Usa ka tawo nga gitudlo, gipalingkod sa katungdanan, gitugyanan ingong usa ka prinsipe o dakodako. Ang lima ka pangulo sa Midian, “ang mga duke ni Sihon,” nga gitawag ug “mga hari sa Midian” sa Numeros 31:​8, gipatay sa dihang ang Israel nanimalos sa mga Midianhon tungod sa panghitabo sa Baal sa Peor. (Jos 13:21) Ang mga pangulo sa mga kaaway sa katawhan sa Diyos gitawag ug “mga duke” (“mga prinsipe,” AT; KJ; RS) sa Salmo 83:11. Ang Hebreohanong termino nga na·sikhʹ (duke) makita usab sa Ezequiel 32:30.

Ang usa ka Mesiyanikong tagna nag-ingon nga, sa dihang ang mga kaaway sa katawhan sa Diyos moanha batok kanila, patindogon ang “pito ka magbalantay, oo, walo ka duke gikan sa katawhan [“mga prinsipe sa katawhan,” KJ, sa panaplin; RS].” Sanglit ang pito naghawas sa kabug-osan, ang “walo ka duke” dayag nga nagpasabot nga usa ka dakong gidaghanon sa mga tawong takos nga gitudlo ubos sa pagmando sa Mesiyas ang manguna sa katawhan ni Jehova.​—Miq 5:5.