Ang pangunang Hebreohanong termino nga nagpasabot ug “dungog o pasidungog” mao ang ka·vohdhʹ, nga sa literal nagkahulogang “kabug-at.” (Itandi ang paggamit sa kaamgid nga mga termino diha sa 1Sa 4:18 ug 2Sa 14:26.) Busa ang usa ka tawo nga gipasidunggan giisip nga may gibug-aton o adunay bili. Sa Grego, ang nombre nga ti·meʹ nagkahulogan ug “dungog,” “pagtamod,” “bili,” “pagkabililhon.” Busa ang berbo nga ti·maʹo mahimong magkahulogan usab ug “gipresyohan” (Mat 27:9); ang nombre nga ti·meʹ mahimong magkahulogan nga “bili,” “halin” (Mat 27:6; Buh 4:34); ug ang adhetibo nga tiʹmi·os mahimong magkahulogan nga “tinamod,” “minahal, o hinungdanon,” ug “bililhon.”​—Buh 5:34; 20:24; 1Co 3:12.

Si Jehova nga Diyos ug ang Iyang Anak. Tungod sa iyang pagka-Maglalalang ug pagka-Soberano, si Jehova nga Diyos takos sa pasidungog, pagtamod o pagtahod. (1Ti 1:17; Heb 3:​3, 4; Pin 4:9-11) Ang katawhan naghatag niini nga pasidungog pinaagi sa pagbuhat kon unsay makapahimuot sa iyang panan-aw, sama sa gibuhat kanunay sa iyang Anak. (Ju 8:​29, 49) Samtang gipatuman pa ang pakigsaad sa Balaod, ang mga Israelinhon makapasidungog kang Jehova pinaagi sa pagtanyag sa ilang kinamaayohang mga halad.​—Pr 3:9; Mal 1:6-8.

 Ang pormalistiko lamang nga pagsunod sa panggawas nga mga paagi sa pagsimba dili mohatag ug tinuod nga pasidungog sa Labing Gamhanan. Kinahanglan usab ang tinuod nga gugma alang sa mga dalan ni Jehova ug kinasingkasing nga tinguha sa pagbuhat sa iyang kabubut-on. Wala kini taliwala sa relihiyosong mga pangulo sa Judaismo panahon sa yutan-ong ministeryo ni Jesus.​—Mar 7:6; Isa 29:13.

Gipakita ni Jesu-Kristo ang hingpit nga panig-ingnan sa pagpasidungog sa iyang Amahan, nga sa bug-os nagtuman sa Iyang kabubut-on bisan hangtod sa pagtugyan sa iyang kinabuhi ingong halad. (Mat 26:39; Ju 10:​17, 18) Tungod kay iyang gikalipay ang pagbuhat sa kabubut-on sa Amahan, ang iyang Amahan nagpasidungog kaniya pinaagi sa pag-ila kaniya ingong Iyang hinigugma ug inuyonang Anak. (2Pe 1:17; Mat 17:5) Human matapos ang yutan-ong kinabuhi ni Jesus, ang Diyos naghatag ug mas dako pang dungog ug dignidad sa iyang Anak kay sa nabatonan ni Jesus una pa siya mahimong tawo. (Flp 2:9-11) Gipakita sa kahimtang ni Jesu-Kristo kon sa unsang paagi pasidunggan sa Labing Hataas ang tanan nga nagpasidungog Kaniya, nga ilhon sila ingong Iyang inuyonang mga alagad ug dagayang magapanalangin kanila.​—1Sa 2:30.

Sanglit si Jehova nga Diyos mao man ang nagbayaw pag-ayo sa iyang Anak, ang tanan nga modumili sa pag-ila kang Jesu-Kristo ingong ang walay-kamatayon nga Hari sa mga hari ug Ginoo sa mga ginoo wala magpasidungog sa Amahan. Tungod sa kon kinsa siya ug kon unsa ang iyang nalampos, ang Anak takos sa pasidungog ug maunongong pagpaluyo. (Ju 5:23; 1Ti 6:​15, 16; Pin 5:11-13) Ang tanan nga nagtinguhang pasidunggan sa Anak ingong iyang inuyonang mga tinun-an kinahanglang mosundog sa iyang panig-ingnan ug matinumanong mosunod sa iyang pagtulon-an.​—Rom 2:​7, 10.

Ubang mga Tawo nga Pagapasidunggan. Samtang si Jehova nga Diyos ug ang iyang Anak takos sa kinalabwang pasidungog, adunay mga relasyon taliwala sa mga tawo nga nanginahanglan usab ug pasidungog. Ang mga anak kinahanglang magpasidungog sa ilang mga ginikanan pinaagi sa pagkamasinugtanon. (Deu 5:16; Efe 6:​1, 2) Kon ang mga ginikanan nanginahanglan, ang ilang hamtong nga mga anak makapasidungog kanila pinaagi sa pagkaandam sa pagtaganag materyal nga tabang. (Mat 15:4-6; 1Ti 5:​3, 4) Samtang ang bana magpasidungog sa iyang asawa pinaagi sa pagpakiglabot kaniya uban ang gugma ug dignidad, ang asawa magpasidungog sa iyang bana pinaagi sa pagpasakop ug pagpakitag halalom nga pagtahod. (1Pe 3:1-7) Ang mga ansiyano nga makugihon sa pagpanudlo kinahanglang hatagan ug “doble nga pasidungog,” nga dayag nga naglakip sa materyal nga tabang. (1Ti 5:​17, 18) Ang Kristohanong mga ulipon kinahanglang magpasidungog sa ilang mga agalon pinaagi sa matinahorong pagtuman sa mga buluhaton nga gipabuhat kanila. (1Ti 6:​1, 2) Ang mga magmamando ug ang uban nga may awtoridad angayng hatagan ug pasidungog o pagtahod nga nahiangay sa ilang katungdanan. (Rom 13:7) Bisan pa sa ilang mga kahimtang sa kinabuhi, ang tanang matang sa tawo ingong bahin sa kalalangan sa Diyos takos nga pasidunggan.​—1Pe 2:17.

Ang mga Kristohanon kinahanglang manguna sa pagpakitag pasidungog sa mga isigkamagtutuo. (Rom 12:10) Kini naglakip sa pagpangita dili sa kaugalingong kaayohan kondili nianang sa uban. (1Co 10:24) Nagkinahanglan kini ug pagkaandam sa pagbuhat sa ubos nga mga buluhaton. (Luc 22:26; Ju 13:12-17) Kining maayong espiritu padayong mahuptan pinaagi sa paghinumdom nga bililhon sa Diyos ang matag magtutuo ug nga gikinahanglan sa mga Kristohanon ang usag usa, sama nga ang matag sangkap sa tawhanong lawas nagdepende sa ubang mga bahin niini.​—1Co 12:14-27.

Bisan tuod wala mag-apas ug pasidungog, ang mga Kristohanon angayng magmahunahunaon sa paghupot ug dungganong baroganan atubangan kang Jehova nga Diyos ug sa iyang Anak. Tungod niini kinahanglang magbantay sila batok sa makadaot nga mga kaubanan ug suklan ang mga tinguha sa makasasalang unod. Pinaagi lamang sa pagpabiling putli sa moral ug sa espirituwal nga ang usa ka tawo magpabiling usa ka dungganong sudlanan aron magamit sa Diyos. (1Te 4:3-8; 2Ti 2:20-22; Heb 13:4) Pinaagi lamang niini nga mahuptan ang tinuod nga kadungganan.