Usa ka pangunang Filistehanon nga siyudad, lagmit ang sentro sa pangagamhanan sa usa sa ilang lima ka magkaabin nga mga ginoo sa halayong amihanan. (Jos 13:3) Ang eksaktong nahimutangan niini dili matino, apan kasagarang gituohan nga kini mao ang Khirbet el-Muqannaʽ (Tel Miqne), mga 18 km (11 mi) sa S sa Asdod.  Nadiskobrehan sa dili pa dugayng pagpangubkob didto ang kinadak-ang siyudad sa panahon niini ug maoy gipaboran karon ingong mao ang dapit sa Ekron.

Ang kasaysayan sa Ekron maoy kasaysayan sa kanunayng pag-ilis-ilis ug pagmando. Ang pagpanakop ni Josue wala maglakip sa Ekron. Hangtod sa ulahing panahon lamang nga kini nasakop sa mga Judeanhon. (Jos 13:​2, 3; Huk 1:18) Sa unang pagbahinbahin sa Yutang Saad, ang Ekron mao ang utlanan tali sa Juda ug Dan apan anaa sa sulod sa tribo ni Juda. (Jos 15:​1, 11, 45, 46; 19:40-43) Sa dihang nailog sa mga Filistehanon ang arka sa pakigsaad, ang Ekron ilang napanag-iya pag-usab. Ang pagkaatua sa Arka nakapatungha ug “makamatay nga kaguliyang” niini nga siyudad, ug gikan sa Ekron nga sa kataposan ang Arka gipadala ug balik ngadto sa mga Hudiyo. (1Sa 5:10-12; 6:​16, 17) Human sa laing yugto nga nailalom sa pagkontrolar sa mga Israelinhon, ang mga Filistehanon mopatim-awng mao na usab ang nanag-iya sa Ekron sa panahon nga gipatay ni David si Goliat. (1Sa 7:14; 17:52) Sa sayong bahin sa ikanapulong siglo W.K.P. si Paraon Sisak sa Ehipto nangangkon nga nag-ilog sa Ekron. Mga duha ka siglo sa ulahi, sumala sa mga talaan sa kasaysayan ni Senakerib, si Haring Padi sa Ekron maoy maunongon sa mga Asiryanhon.