[Ang Akong Diyos Maoy Amahan].

1. Anak nga lalaki ni Helon sa tribo ni Zabulon; usa sa 12 ka pangulo nga gitudlo ni Jehova aron motabang kang Moises ug Aaron sa pag-ihap sa mga anak nga lalaki sa Israel nga magsundalo. (Num 1:1-4, 9, 16) Si Eliab mao ang nangulo sa panon sa iyang tribo, nga lakip sa tulo-ka-tribo nga dibisyon sa kampo sa Juda. (Num 2:​3, 7; 10:14-16) Dugang pa sa pagpakig-ambit sa ginurupo nga paghalad nga gihimo sa mga pangulo human sa pagpatindog sa tabernakulo, ang pangulong si Eliab human niana naghalad ug kaugalingon niyang halad sa ikatulong adlaw alang sa inagurasyon sa halaran.​—Num 7:1-3, 10, 11, 24-29.

2. Anak nga lalaki ni Palu sa tribo ni Ruben; amahan ni Nemuel. Ang ubang mga anak nga lalaki ni Eliab nga si Datan ug Abiram misuportar kang Kore sa iyang pagrebelde batok kang Moises ug gilamoy kauban sa ilang mga panimalay pinaagi sa milagrosong pagbuka sa yuta.​—Num 16:​1, 12; 26:8-10; Deu 11:6.

3. Usa ka Levihanon sa banay sa mga Kohatnon ug usa ka katigulangan ni Samuel nga manalagna. (1Cr 6:​22, 27, 28, 33, 34) Ginganlan siya ug Eliel sa 1 Cronicas 6:34 ug Elihu sa 1 Samuel 1:1.

4. Ang panganay ni Jese nga amahan ni Haring David. (1Sa 17:13; 1Cr 2:13) Nakadayeg pag-ayo si Samuel sa panagway ug gitas-on ni Eliab nga tungod niana iyang gihunahuna nga siya mao ang gipili sa Diyos nga mahimong hari. Apan, gisalikway ni Jehova si Eliab ug gipili si David.​—1Sa 16:6-12.

Si Eliab, Abinadab, ug Sammah, nga tulo ka kamagulangang anak nga lalaki ni Jese, kauban sa kasundalohan ni Saul sa dihang gihagit sa Filistehanong bantogang manggugubat nga si Goliat ang mga tawo sa Israel. Sa wala madugay, una pa mobalik si Goliat gikan sa talay sa kasundalohan sa mga Filistehanon aron sa pagtamay sa Israel, si David nga gisugo sa iyang amahan miabot nga nagdalag mga pagkaon alang sa iyang tulo ka igsoong lalaki. Kay nasuko pag-ayo sa pagpangutana ni David sa Israelinhong mga manggugubat bahin sa ganti nga madawat sa usa nga makapatay kang Goliat, gikasab-an pag-ayo ni Eliab si David, nga nag-ingon nga siya nagpasagad sa iyang pag-atiman sa iyang katungdanan sa pagkamagbalantay ug nag-akusar kaniya nga siya mapangahason ug may daotang kasingkasing. (Kini nga asoy bahin sa pagsugo kang David ug sa kasuko ni Eliab wala ilakip sa Vatican Manuscript Num. 1209.)​—1Sa 17:​13, 17, 26-28.

Sa ulahi pa gayod, mopatim-aw nga ang anak nga lalaki ni David nga si Jerimot naminyo kang Abihail nga anak nga babaye ni Eliab.​—2Cr 11:18.

5. Usa sa mga Gadhanon nga mitipon kang David samtang siya ilalom pa sa mga pagpig-ot tungod kang Haring Saul. Ang mga Gadhanon gihubit ingong “maisog, mga tawong gamhanan,” nga ang labing ubos maoy katumbas sa usa ka gatos, ug ang labing dako maoy katumbas sa usa ka libo.​—1Cr 12:​1, 8, 9, 14.

6. Usa ka Levihanong maghohoni sa ikaduhang dibisyon nga mitabang sa pagtugtog sa dihang gipabalhin ni Haring David ang arka ni Jehova ngadto sa Jerusalem gikan sa balay ni Obed-edom.​—1Cr 15:​18, 20, 25; 16:5.