[Ang Akong Diyos Nagbangon].

1. Anak nga lalaki ni Hilkias; pangulong administrador sa mga kalihokan sa balay ni Ezequias nga hari sa Juda sa dihang gisulong ang Juda sa Asiryanhong hari nga si Senakerib niadtong 732 W.K.P.

Samtang si Sebna mao pa ang “nagdumala sa balay,” gitagna ni manalagnang Isaias nga siya tangtangon gikan niini nga katungdanan ug pulihan ni Eliakim, kinsa gitawag ni Jehova nga “akong alagad.” Ang pagpuli pagahimoon pinaagi sa pagsul-ob kang Eliakim sa opisyal nga taas nga besti ug paha ni Sebna. Dugang pa, “ang yawi sa balay ni David” igabutang sa abaga ni Eliakim, nga nagpasabot nga siya maoy piyalan sa pagdumala sa mga lawak sa hari ug sa awtoridad sa paghukom kon kinsa ang mahimong dawaton sa pag-alagad sa hari.​—Isa 22:15-24.

Kay naghupot niining opisyal nga katungdanan, si Eliakim, si Sebna nga sekretaryo, ug si Joa, lagmit ang tigtala, migula aron makigsulti kang Rabsake, kinsa miadto sa Jerusalem uban ang dakong pundok sa kasundalohan aron pasurenderon ang siyudad. Unya, nga ginisi ang mga besti, silang tulo nagtaho sa mga pulong sa tigpamaba ni Senakerib ngadto kang Haring Ezequias, nga sa baylo nagsugo kang Eliakim, Sebna, ug sa mga ansiyano sa mga saserdote nga moadto kang Isaias aron magpakisayod kang Jehova.​—Isa 36:​11, 22; 37:​1, 2; 2Ha 18:​17, 18, 26, 36, 37; 19:​1, 2.

2. Hari sa Juda (628-618 W.K.P.) kinsa gibutang ni Paraon Neko sa trono ug giilisdan ang iyang ngalan ug Jehoiakim. Si Eliakim maoy anak nga lalaki ni Haring Josias.​—2Ha 23:34; tan-awa ang JEHOIAKIM.

3. Usa sa Levihanong mga saserdote nga nagdala ug mga trompeta kinsa apil sa parada nga gihikay ni Nehemias panahon sa inagurasyon sa pagtukod pag-usab sa paril sa Jerusalem.​—Neh 12:​31, 41.

4. Usa ka katigulangan ni Jose nga amaama ni Jesus.​—Mat 1:13.

5. Usa ka katigulangan ni Maria nga yutan-ong inahan ni Jesus.​—Luc 3:30.