[Siya ang Akong Diyos].

1. “Anak nga lalaki ni Barakel nga Buzihanon sa banay ni Ram.” Ingong kaliwat ni Buz, dayag nga si Elihu maoy layo nga paryente ni Abraham. (Job 32:​1, 2, 6; Gen 22:​20, 21) Lagmit nga naminaw pag-ayo si Elihu sa tibuok nga debate tali kang Job ug sa iyang tulo kunohay ka maghuhupay. Apan, agig pagtahod tungod sa ilang panuigon, siya nagpakahilom hangtod nga natapos ang tanan sa pagsulti. Bisag gitawag si Elihu sa modernong mga kritiko ingong tabian, nga nag-ingon nga ang iyang mga pakigpulong makapuol tungod sa kataas, ang mga pulong ni Elihu dili kay naggikan sa usa ka batan-on nga walay tahod. Siya bug-os nasayod nga ang kaalam dili kay iya lamang sa mga tigulang, kondili ang espiritu sa Diyos mao ang naghimo sa usa nga tinuod nga maalamon. Busa, si Elihu misalig pag-ayo sa espiritu sa Diyos. Sa ingon siya tukmang nakasabot nga napakyas si Job sa pagsabot nga ang pagbindikar kang Jehova nga Diyos labi pang hinungdanon kay sa pagbindikar kang bisan kinsang tawo ug ang tulo ka higala ni Job nagpahayag gayod nga daotan ang Diyos.​—Job 32:2-9, 18.

Si Elihu walay pinalabi, ug wala mogamit ug maulog-ulogong titulo alang kang bisan kinsa. Iyang giila nga siya, sama kang Job, hinimo sa yutang-kulonon ug ang Labing Gamhanan mao ang iyang Maglalalang. Dili tuyo ni Elihu nga hadlokon si Job apan namulong kaniya ingong usa ka tinuod nga higala, nga nagtawag kang Job sa iyang ngalan, butang nga wala buhata ni Elipaz, Bildad, o Zopar.​—Job 32:​21, 22; 33:​1, 6.

Sa tanang bahin gibayaw ni Elihu ang posisyon sa matuod nga Diyos: Ang Labing Gamhanan matarong ug moganti sa matag usa sumala sa iyang panggawi. Siya mohukom nga walay pagpalabi ug bug-os nasayod sa binuhatan sa mga tawo. Ang Diyos mamati sa pagtuaw sa mga sinakit. Siya usa ka Magtutudlo nga maghimo sa mga tawo nga mas maalamon kay sa kahayopan. Bakak lamang ang dili pamatian sa Diyos, ug busa gidasig ni Elihu si Job sa paghulat Kaniya. Dugang pa, gipasaligan ni Elihu si Job nga ang Diyos nag-uban kaniya ug dili Niya tipigang buhi ang mga daotan, apan kadtong nag-alagad Kaniya “matapos nila ang ilang mga adlaw diha sa kon unsay maayo.” (Job 36:11) Dayon gitambagan si Job nga bayawon ang mga buhat sa Diyos, ang dakong Magtatagana, kinsa dagayang nagahatag ug pagkaon. Giawhag ni Elihu si Job sa pagtagad sa dagkong mga butang nga nahimo sa Diyos ug sa Iyang pagkontrolar sa kinaiyanhong mga puwersa, nga nagdasig kang Job nga “magmatinagdanon sa katingalahang mga buhat sa Diyos.” (Job 37:14) Si Elihu mihinapos pinaagi sa hamiling mga pulong, nga nag-ingon mahitungod sa Labing Gamhanan: “Siya binayaw sa gahom, ug ang hustisya ug ang dagayang pagkamatarong dili niya pagatamayon. Busa ang mga tawo angay nga mahadlok kaniya.”​—Job 37:​23, 24; kap 34-37.

Pinaagi lamang sa espiritu sa Diyos nga si Elihu tukmang nakatino sa mga butang ug nakasulti sa mga pulong nga natuman nganha kang Job sa dihang siya napasig-uli: “Luwasa siya gikan sa pagkahulog sa gahong! Ako nakakaplag ug usa ka lukat! Mabag-o ang iyang unod labi pa kay sa pagkabatan-on; mahibalik siya sa mga adlaw sa kabaskog sa iyang pagkabatan-on.”​—Job 33:​24, 25.

2. Katigulangan sa manalagnang si Samuel; ang anak nga lalaki ni Tohu. (1Sa 1:1) Dayag nga si Elihu gitawag usab ug Eliab ug Eliel.​—1Cr 6:​27, 34.

3. Gituohan nga mao ang kamagulangang igsoon ni Haring David nga si Eliab; nahimong prinsipe sa tribo ni Juda.​—1Cr 27:​18, 22; itandi ang 1Sa 16:6; tan-awa ang ELIAB Num. 4.

4. Usa sa pito ka pangulo sa linibo nga sakop ni Manases ug mitalikod dapig kang David sa Ziklag.​—1Cr 12:20.

5. Usa ka Korehanon sa banay ni Obed-edom nga usa ka magbalantay-sa-ganghaan sa balay sa Diyos, nga gitudlo sa panahon sa paghari ni David.​—1Cr 26:​1, 4, 7, 8.