1. Panganay nga anak nga lalaki ni Esau, pinaagi sa iyang Canaanhong asawa nga si Ada. Unom o pito sa mga anak nga lalaki ni Elipaz, lakip kang Teman, Omar, ug Amalek, nahimong mga sultan sa Edomhanong mga tribo.​—Gen 36:​4, 10-12, 15, 16; 1Cr 1:​35, 36; tan-awa ang SULTAN.

2. Usa sa tulo ka higala ni Job. (Job 2:11) Usa ka Temanhon, lagmit siya maoy kaliwat sa Num. 1, busa usa ka kaliwat ni Abraham ug layong paryente ni Job. Siya ug ang iyang mga kaliwat nagpasigarbo sa ilang kaalam. (Jer 49:7) Sa tulo ka “maghuhupay,” mopatim-awng si Elipaz mao ang labing prominente ug impluwensiyado, nga nagpaila usab nga lagmit siya ang kamagulangan. Siya mao ang unang namulong sa tulo ka hugnang debate, ug mas taas ang iyang mga pakigpulong.

Ingon niini ang pangatarongan ni Elipaz sa iyang unang pakigpulong: “Kinsa ba ang walay sala nga nawagtang sukad? Ug diin ba nga ang matul-id napapha sukad?” Busa, siya mihinapos nga si Job nakabuhat gayod ug daotan nga takos silotan sa Diyos. (Job kap 4, 5) Sa iyang ikaduha nga grabeng pagsaway gibiaybiay ni Elipaz ang kaalam ni Job: “Ang tawong maalamon motubag ba pinaagi sa kawang nga kahibalo, o pun-on ba niya ang iyang tiyan sa hangin nga timog? . . . Unsa may imong nasabtan nga wala usab kanamo?” Gipasabot ni Elipaz nga si Job “nagpakita sa iyang kaugalingon nga labaw” kay “sa Labing Gamhanan.” Sa pagtapos sa iyang ikaduhang walay pasukaranang akusasyon batok sa maayong mga hiyas ni Job, ang Edomhanon naghubit kang Job ingong usa ka apostata, nga nagpuyo sa mga tolda sa panghiphip, usa ka tawo nga puno sa panglimbong. (Job 15) Sa kataposan gisakit ni Elipaz si Job sa ikatulong higayon, nga bakak nga nag-akusar kaniya sa tanang matang sa salaod​—pagpangilkil, paghikaw sa tubig ug tinapay gikan sa mga kabos, ug pagdaogdaog sa mga babayeng balo ug mga ilo.​—Job 22.

Human sa ikaduhang pangatake ni Elipaz si Job maayong mitubag: “Kamong tanan maoy samokan nga mga maghuhupay! Aduna bay kataposan sa kawang nga mga pulong?” (Job 16:​2, 3) Pagkahuman sa mga debate si Jehova mismo miingon kang Elipaz: “Miinit ang akong kasuko batok kanimo ug sa imong duha ka higala, kay kamo wala mosulti sa tinuod mahitungod kanako ingon sa akong alagad nga si Job.” Giingnan si Elipaz nga sila kinahanglang magtanyag ug halad ug unya si Job mag-ampo alang kanila.​—Job 42:7-9.