[Tuboran (Tubod) sa Duha ka Nating Baka].

Diha sa simbolikong panan-awon nga gihatag kang Ezequiel, ang daghag-asin nga katubigan sa Patayng Dagat “mamaayo” ug ang mga mangingisda mobarog sa kabaybayonan niini gikan sa En-gedi hangtod sa En-eglaim. (Eze 47:8-10) Ang ngalan mismo nagpakita nga ang maong dapit duol sa usa ka tubod. Ang kadaghanang eskolar nagtuo nga ang En-eglaim mao ang ʽAin Feshka, duol sa AK nga tumoy sa Patayng Dagat. Ang ʽAin Feshka ug, gikan niini mga 29 km (18 mi) dapit sa H, ang ʽAin Jidi (nga nagpatunhay sa ngalang En-gedi) mao ang duha ka pangunang tubigan nga mga dapit sa kasadpang baybayon sa Patayng Dagat. Sa laing bahin, ang uban nagsugyot sa usa ka dapit sa HS nga baybayon sa Patayng Dagat, duol sa Zoar. Pinasukad sa karaang sinulat nga mga dokumento, nga nagtumong sa distrito sa ʽAgaltain, si Y. Yadin nanghinapos nga “dayag nga kining ‘distrito sa ʽAgaltain’ mao ang habagatan-sidlakang bahin sa Patayng Dagat . . . Kon dunay kalangkitan tali sa ʽAgaltain ug En-eglaim diha sa tagna ni Ezequiel labot sa Patayng Dagat (Ezeq. 47:10: ‘ug mahitabo nga ang mga mangingisda mobarog diha niana gikan sa En-gedi bisan hangtod sa En-eglaim’)​—ang interpretasyon niining tekstoha angay nga ang Dagat mamaayo gikan sa usa ka baybayon ngadto sa pikas nga baybayon​—usa ka buhi ug tin-aw kaayo nga larawan. Dili na kinahanglang pangitaon pa ang En-eglaim sa kasadpang baybayon (gisugyot sa dili pa dugay nga kini mao ang Ain-Feshkha), sanglit kini nga pagsabot maglimite sa matagnaong panan-awon ngadto na lamang sa kasadpang baybayon.”​—Israel Exploration Journal, Jerusalem, 1962, Tomo 12, pp. 250, 251.