[Tuboran (o, Tubod) sa mga Tanaman].

1. Usa ka Judeanhong siyudad sa Sepela, o ubos nga kayutaan, nga gihisgotan diha sa samang grupo uban sa Adulam sa Josue 15:33-35. Lagmit nga ang nahimutangan niini maoy sa modernong Beit Jimal nga mga 2.5 km (1.5 mi) sa H sa Bet-semes, o sa usa ka dapit nga duol niini. Ang Umm Jina, nga nahimutang mga 1 km (0.5 mi) sa K sa Bet-semes, maoy gisugyot sa pipila nga mao ang nahimutangan niini, apan lagmit nga dili, tungod kay walay tuboran nga makaplagan didto.

2. Usa ka siyudad nga nahimutang sa yuta nga napanunod sa tribo ni Isacar. (Jos 19:​17, 21) Lagmit nga kini ang siyudad nga gitawag ni Josephus ug Ginae. Karong adlawa kini gituohan nga mao ang Jenin, usa ka lungsod sa H nga tumoy sa Walog sa Jezreel, nga nahimutang mga 18 km (11 mi) sa HS sa Megido ug 8 km (5 mi) sa AS sa Dotan, diha sa pangunang dalan gikan sa Jerusalem paingon sa Nasaret. Ang Jenin gilibotan sa mga prutasan ug mga tanaman ug adunay usa ka tubod, mga kahubitan nga mohaom sa kahulogan sa ngalang En-ganim.

Ang En-ganim, uban sa mga sibsibanan niini, gihatag ngadto sa mga anak nga lalaki ni Gerson ingong usa ka Levihanong siyudad. (Jos 21:27-29) Sa 1 Cronicas 6:73 kini dayag nga gitawag ug Anem.