[Hinigugma; Hiligugmaon].

1. Usa ka Kristohanon nga nag-alagad kang Pablo sa iyang ikatulong misyonaryong panaw ug kinsa gipadala ni Pablo uban kang Timoteo gikan sa Asia ngadto sa Macedonia. (Buh 19:22) Lagmit nga siya ang Erasto nga nagpabilin didto sa Corinto sa panahong gisulat ni Pablo ang iyang ikaduhang sulat ngadto kang Timoteo.​—2Ti 4:20.

2. Ang piniyalan sa siyudad sa Corinto kansang mga pangomosta giapil ni Pablo diha sa iyang sulat ngadto sa mga taga-Roma. (Rom 16:23) Sa panahon sa mga pagpangubkob didto sa Corinto niadtong 1929 si Propesor T. L. Shear nakakaplag ug binakbakan nga luna nga adunay inskripsiyon sa Latin, nga mabasa: “Si Erasto, nga prokurador [ug] aedile, nagpahimo niining binakbakan nga luna pinaagi sa iyang kaugalingong gasto.” Bisan tuod ug wala mahibaloi kon mao ba kini nga Erasto ang gihisgotan ni Pablo, ang binakbakan nga luna gituohan nga naglungtad sa unang siglo K.P. Gituohan nga ang piniyalan sa siyudad mao usab ang kauban ni Pablo sa panaw (tan-awa ang Num. 1). Apan, sanglit malisod man alang kang Erasto ang pag-uban kang Pablo ug sa samang higayon mag-atiman sa iyang mga buluhaton ingong piniyalan sa siyudad, kadtong nagtuo niini sagad mihinapos nga si Erasto nakahupot niining opisyal nga posisyon sa mas una pa nga panahon ug busa si Pablo nagtawag kaniya pinaagi niini nga titulo.