Ang ngalan sa usa ka kahoy (Heb., tidh·harʹ) nga kaduha makita sa Hebreohanong Kasulatan, sa Isaias 41:19 ug 60:13. Diha sa unang teksto gihisgotan kini lakip sa mga kahoy sama sa junipero ug sipres, nga mabuhi diha sa desyertong kapatagan ilalom unya sa gitagnang mga kahimtang diha sa paraiso, ug diha sa ikaduhang teksto kini gihisgotan lakip sa samang mga kahoy ingong bahin sa “himaya sa Lebanon.” Dili matino kon unsa gayod nga kahoy ang gitumong sa Hebreohanong pulong niini, apan adunay ebidensiya nga nagpunting nga mao kini ang kahoyng fresno.​—Tan-awa ang Theologische Literaturzeitung, Leipzig, 1926, p. 216.

Adunay duha ka matang sa fresno, ang Fraxinus ornus ug ang Fraxinus oxycarpa, nga makaplagan ubay sa mga suba ug mga sapa sa kabukiran sa Lebanon ug sa ibabaw nga bahin sa Palestina, bisan tuod dili sa katibuk-ang Palestina. Kini nga kahoy angayan nga mahimong bahin sa “himaya sa Lebanon,” kay usa kini ka dako nga kahoy nga motubo hangtod sa 15 m (50 p) ang gitas-on. Kini adunay hayag-berde nga mga dahon ug abohon ug kolor nga gagmayng mga sanga. Bisan tuod sa botanika kini kapamilya sa olibo, ang fresno lahi sa olibo tungod kay ang mga dahon niini madagdag sa matag tinghunlak.