Mga partikulo sa tubig nga nag-utaw-utaw sa kahanginan; kini sama sa alindahaw. Sa dihang ang init ug umogon nga hangin mosaka gikan sa yuta ug mobugnaw sa temperatura nga gitawag ug dew point (ang temperatura sa pagkahimong yamog), ang umog manibuok tungod kay ang bugnawng hangin dili makahawid ug daghang tubig sama sa init nga hangin. Kon kini manibuok duol sa yuta, kini tawgon nga gabon; apan kon kini manibuok diha sa kahanginan sa itaas, kini tawgon nga panganod. (Sal 135:7; Pr 25:14; Jer 10:13; 51:16) Ang umog nga manibuok diha sa bugnawng mga butang, sama sa yuta o sa katanoman (sagad sa gabii), tawgon nga yamog. (Ex 16:​13, 14; Huk 6:36-40; tan-awa ang YAMOG.) Sa laing bahin, ang gabon sa kahanginan maoy mga partikulo sa umog nga gipadpad sa hangin nga medyo mas dagko kay  sa mga partikulo sa gabon sa yuta, apan mas gagmay kay sa mga tinulo sa ulan.

Ang balaknong paghubit sa Bibliya labot niining pisikal nga mga proseso nahiuyon sa siyentipikanhong mga kaplag. Gisulti ni Elihu kon sa unsang paagi si Jehova, ang Tinubdan sa tanang kainit ug enerhiya, nagpasaka una sa umog gikan sa yuta ug dayon nagpahinabo niini nga inanayng motaligsik ug mahulog ingong ulan ug gabon (Heb., ʼedh), nga samag gisala.​—Job 36:​27, 28.

Diha sa asoy sa Genesis bahin sa mga kahimtang dinhi sa yuta panahon sa usa ka yugto sa “mga adlaw” sa paglalang makaplagan ang bugtong laing paghisgot sa Hebreohanong pulong nga ʼedh (gabon). “Si Jehova nga Diyos wala pa magpaulan diha sa yuta . . . Apan dihay gabon nga mialisngaw gikan sa yuta [lakip sa mga sapa, mga lanaw, ug kadagatan] ug gitubigan niini ang tibuok nawong sa yuta.” (Gen 2:​5, 6) Hinunoa, gisabot sa mga maghuhubad sa karaang mga bersiyon (LXX, Vg, Sy) nga kini nagtumong dili sa gabon, apan sa usa ka tuboran, nga nagtuo nga ang yuta gitubigan pinaagi sa tab-ang nga tubig nga nagaagos sa ilalom sa yuta.

Mahulagwayong Paggamit. Sa siyudad sa Pafos sa pulo sa Cipro, si Bar-Jesus (Elimas) nga usa ka barangan ug mini nga manalagna misupak kang Pablo sa dihang nakigsulti ang apostol sa prokonsul nga si Sergio Paulo. Giingnan siya ni Pablo nga ang kamot ni Jehova maoy batok kaniya ug siya mabuta sulod sa usa ka yugto sa panahon. “Dihadiha usa ka mabagang gabon ug kangitngit ang mitakyap kaniya.” Lagmit ang iyang panan-aw migabon, o mihalap, nga gisundan dayon sa tumang kangitngit. Sa paghubit sa hitabo, ang doktor nga si Lucas migamit sa Gregong medikal nga termino nga a·khlysʹ (baga nga gabon).​—Buh 13:4-11.

Si apostol Pedro, sa iyang pagpasidaan batok sa mini nga mga magtutudlo ug sa posibleng mga tigdaot sa Kristiyanidad nga mahimong hinok nga moyuhot sa Kristohanong kongregasyon, miingon: “Sila maoy mga tuboran nga walay tubig, ug mga gabon nga gipalid sa kusog nga bagyo, ug alang kanila gitagana ang naglugitom nga kangitngit.” Ang mga magpapanaw sa Tungang Sidlakan sinati kaayo sa bationg kahigawad sa dihang moadto sa usa ka tuboran o atabay nga naglaom nga makakuhag makarepreskong tubig, apan makakaplag lamang niini nga nahubsan. Sa Palestina, sa bulan sa Agosto, adunay panagsang cirrostratus nga mga panganod gikan sa K nga wala magdalag ulan. Ang usa ka mag-uuma nga naglaom nga mabisbisan ang iyang mga pananom niining hugpong sa nipis ug samag-gabon nga mga panganod mahigawad gayod. Ingon usab niini ang kahimtang niining mini nga mga magtutudlo, kining imoral nga mga tawo, sama sa dugang pang giingon ni Pedro: “Kay sila nagsultig hinambog nga mga pulong nga walay kapuslanan, ug pinaagi sa mga tinguha sa unod ug pinaagi sa malaw-ayng mga pamatasan sila naghaylo kanilang bag-o pang nakalingkawas gikan sa mga tawo nga nagagawi diha sa kasaypanan. Samtang sila nagsaad kanila ug kagawasan, sila mismo maoy mga ulipon sa pagkadunot.”​—2Pe 2:​1, 17-19.

Ang mga Kristohanon gipahinumdoman sa paghatag ug pagtagad kang Jehova sa tanan nilang mga plano, nga dili manghambog sa ilang pagabuhaton, kondili angayng hinumdoman nga ang kinabuhi niining sistema sa mga butang maoy lumalabay ug walay kasegurohan, tungod kay sila sama sa gabon nga dali rang mahanaw.​—San 4:14; tan-awa ang PANGANOD.