[Heb., zeʹmer].

Usa ka gamayng antelope nga samag kanding nga mailhan pinaagi sa sungay niini nga samag kaw-it ug kini nabantog sa kaabtik ug sa pagkadili daling matumba diha sa habog kaayong mga lugar. Ang hingkod nga laki may gitas-on nga 80 sm (32 pul.) hangtod sa abaga niini ug motimbang ug kapin sa 30 kg (66 lb). Sa ting-init, ang balhibo sa gamusa maoy kapehon ug kolor nga modagtom inig-abot sa tingtugnaw. Ang gamusa gitala nga lakip sa mga hayop nga mahimong kan-on, sumala sa gilatid sa Balaod.​—Deu 14:5.

Dili matino kon unsang hayopa ang gipasabot sa Hebreohanong pulong nga zeʹmer, nga gihubad sa lainlaing paagi nga “gamusa” (KJ, AS, ER, NW, Yg), “kanding sa bukid” (La), “karnero sa bukid” (AT, JB, Mo, Ro), “antelope” (Le), ug gihatagan lamang ug katumbas nga espeling nga “zemer” (Kx). Ang lintunganayng pulong sa Hebreohanon diin gikuha ang pulong nga zeʹmer giisip nga amgid sa Arabikong pulong nga zamara (lukso; kalagiw), nga nagpasabot sa usa ka tiglumpat, tiglukso nga hayop, busa sama sa usa ka gasela. Ang pipila ka zoologo nag-ingon nga ang gamusa (Rupicapra rupicapra) dili makita sa Palestina. Bisan pa niana, ang mga lumad nga matang niini nga hayop makaplagan sa kabukiran sa Carpathia ug sa Caucasus, busa adunay posibilidad nga sa usa ka panahon dihay usa ka matang sa gamusa sa kabukiran sa Lebanon.