Usa ka puting lanot sa liso nga gipatungha sa pipila ka tanom ug gigamit sa paghimog panapton. Ang Hebreohanong pulong nga kar·pasʹ, nga mahimong magtumong sa pino nga gapas o kaha sa pino nga lino, maoy susama sa Sanskrit nga pulong nga karpasa ug sa Gregong pulong nga karʹpa·sos. Daghang modernong mga hubad mipabor sa hubad nga “panapton sa gapas” diha sa Ester 1:6. Kini gihisgotan nianang tekstoha nga lakip sa mga materyales nga gigamit sa pagdayandayan sa sawang sa palasyo panahon sa pito ka adlaw nga bangkete ni Haring Ahasuero didto sa Susan. Ang pagpananom ug gapas didto sa Persia ug India maoy sukad pa sa karaang kapanahonan. Bisan tuod ang lino mopatim-awng mas kaylap nga gigamit didto sa Ehipto ug Palestina, adunay ebidensiya nga ang gapas gigamit usab didto sukad pa sa unang milenyo W.K.P.

Ang tanom nga gapas diha sa asoy sa Bibliya gituohan nga mao ang matang nga giklasipikar ingong Gossypium herbaceum. Kini nga kahoykahoy motubo sa gitas-on nga mga 1.5 m (5 p), mamulak ug dalag o usahay rosason, ug human mauga ang mga bulak, kini mopatunghag mga bunga sa gapas o mga kapsula sa liso. Inigkahinog, ang mga bunga mabuak, nga magpagula sa hunolon nga gapas. Human matigom ang gapas, kuhaan kini sa mga liso, o sudlayon, pinaagi sa paggamit ug galingan sa gapas. Human niana ang mga lanot sa gapas andam na alang sa kataposang proseso ug sa paghablon. Ang pipila ka eskolar nagtuo nga ang “puting panapton” nga gihablon sa mga maghahabol sa Ehipto nga gihisgotan sa Isaias 19:9 lagmit gama sa gapas.​—Tan-awa ang PANAPTON, TABIL.