Kini maoy mga butang nga gihatag ngadto sa usa nga nanginahanglan aron sa pagsalbar sa iyang kahimtang. Bisan tuod ang “mga gasa sa kaluoy” (sa ubang mga hubad, “hinabang” o “mga buhat sa kaluoy”) wala direktang hisgoti diha sa Hebreohanong Kasulatan, ang Balaod naghatag ug espesipikong mga direksiyon ngadto sa mga Israelinhon bahin sa ilang mga obligasyon ngadto sa mga kabos. Kinahanglang dili nila kumkomon ang ilang mga kamot, kondili magmahinatagon sa pagpakiglabot sa ilang kabos nga mga igsoon.​—Deu 15:7-10.

Mga Probisyon Alang sa mga Kabos sa Israel. Ang Balaod nagtugot sa usa ka tawo sa pag-adto sa usa ka parasan ug sa umahan sa laing tawo ug didto mokaon sa abot niini hangtod sa pagkatagbaw; apan walay usa niini nga iyang dad-on. (Deu 23:​24, 25) Sa pag-ani sa ilang mga abot, dili hutdon sa mga Israelinhon sa pag-ani ang mga daplin sa ilang kaumahan ni hagdawan ang ilang kaumahan, kaolibohan, ug kaparasan, kay ang mga hagdawonon maoy alang sa mga langyawng pumoluyo, sa batang ilo-sa-amahan, ug sa babayeng balo.​—Lev 19:​9, 10; Deu 24:19-21.

Sa matag ikatulo nga tuig ang mga Israelinhon kinahanglang magdala sa tibuok ikapulo nga bahin sa ilang abot nianang tuiga ug ibutang kini sa sulod sa ilang mga ganghaan alang sa pagsustento sa mga Levihanon, langyawng pumoluyo, ilo, ug mga babayeng balo.​—Deu 14:​28, 29; tan-awa ang IKAPULO.

Sa matag ika-7 nga tuig ug sa matag ika-50 nga tuig o sa tuig sa Tinghugyaw, ang yuta dili pugsan, aron makapahimulos ug bug-os nga pagpahulay, ug walay naandang pagpangani sa mga abot. Unya ang bisan unsang turok magsilbing pagkaon sa mga kabos, bisan tuod ang mga tag-iyag yuta, ang ilang mga ulipon, ug ang ilang sinuholan nga mga mamumuo may katungod usab sa pagkaon niini. Apan, mopatim-aw nga ang mga Israelinhon sa katibuk-an magkuha gikan sa ilang tinipigang mga suplay sa pagkaon sulod sa tuig nga  Igpapahulay.​—Ex 23:​10, 11; Lev 25:1-7, 11, 12, 20-22.

Ang mga prinsipyo maylabot sa mga obligasyon sa Israel ngadto sa mga kabos sumala sa gilatid sa Balaod gisubli sa ubang mga bahin sa Hebreohanong Kasulatan. (Job 31:16-22; Sal 37:21; 112:9; Pr 19:17; Ecc 11:​1, 2) Kadtong nagpakitag konsiderasyon sa mga timawa gipahayag nga malipayon ug gipasaligan ug panalangin. (Sal 41:​1, 2; Pr 22:9) Sa adlaw ni Isaias, ang dili-matinumanong mga Israelinhon giawhag sa pagpakigbahin sa ilang tinapay ngadto sa mga gigutom, sa pagdala sa mga walay pinuy-anan ngadto sa ilang mga balay, ug sa pagbesti sa mga hubo​—usa ka binuhatan nga mosangpot sa pag-uyon sa Diyos. (Isa 58:​6, 7) Mahitungod sa usa ka matarong nga tawo, si Jehova miingon pinaagi kang Ezequiel: “Sa gigutom iyang gihatag ang kaugalingon niyang tinapay ug ang hubo iyang gibestihan.”​—Eze 18:7-9.

Sa pagkatinuod, angay nga wala untay mga kabos taliwala sa mga Israelinhon, kay si Jehova misaad sa pagpanalangin sa iyang katawhan. Apan ang pagkawalay kakabos nagdepende sa pagkamasinugtanon sa Balaod. Busa, tungod sa tawhanong pagkadili-hingpit ug pagkadili-masinugtanon sa balaod sa Diyos, ang mga Israelinhon kanunayng adunay kabos diha sa ilang taliwala. (Deu 15:​4, 5, 11) Bisan pa niana, ang pagpakilimos dayag nga talagsa ra sa karaang Israel, tungod kay ang usa sa mga kalamidad nga giingon nga modangat sa daotan mao nga ang iyang mga anak mapugos sa pagpakilimos.​—Sal 109:10; itandi ang Sal 37:25; tan-awa ang KABOS.

Sayop nga mga Panglantaw sa Pagpanghatag. Sa paglabay sa panahon, ang pagpanghatag ug mga gasa sa kaluoy sa ngadtongadto giisip sa mga Hudiyo nga dili lamang dungganon kondili giisip usab ingong adunay gahom sa pagpasaylo sa ilang mga sala. Ang Proverbio 11:​4, nga nag-ingong: “Ang bililhong mga butang wala unyay kapuslanan sa adlaw sa mabangis nga kasuko, apan ang pagkamatarong magaluwas gikan sa kamatayon,” sa ulahi gisabot nga nagkahulogan nga, kaharmonya sa ideya sa Talmud: “Ang tubig makapalong sa nagdilaab nga kalayo; ang paghatag ug hinabang makapasaylo usab sa mga sala.” (The Jewish Encyclopedia, 1976, Tomo I, p. 435) Dayag, samtang si Jesu-Kristo dinhi pa sa yuta, ang pagpanghatag gihimo sa uban sa mapagawalong paagi, nga tungod niana siya nagsaway sa maong binuhatan diha sa iyang Wali sa Bukid.​—Mat 6:2-4.

Kristohanong mga Gasa sa Kaluoy. Kadtong sakop sa “gamayng panon” ni Jesus gidasig sa ‘pagbaligya sa mga butang nga ilang napanag-iya ug sa paghatag ug mga gasa sa kaluoy.’ (Luc 12:​32, 33) Ngadto sa datong batan-on nga magmamando si Jesus naghatag ug samang tambag, nga nagdugang, “ug umari ka mahimong akong sumusunod.” (Mat 19:16-22; Luc 18:18-23; tan-awa usab ang Ju 13:29.) Gipasiugda ni Jesus nga ihatag “ingong mga gasa sa kaluoy ang mga butang nga anaa sa sulod.” Busa lagmit gitumong gayod niya ang mga hiyas sa kasingkasing, tungod sa iyang pagpasiugda sa hustisya ug gugma human gilayon niana.​—Luc 11:39-42.

Nag-organisar ug mga hinabang. Ingong resulta sa nadugang nga mga 3,000 ka Hudiyo ug mga kinabig ngadto sa Kristohanong kongregasyon sa adlaw sa Pentekostes ug sa padayong pag-uswag sa gidaghanon wala madugay human niadto, usa ka talagsaong kahimtang ang mitungha taliwala sa mga Kristohanon, nga tungod niana gikinahanglan ang usa ka temporaryong pagpaambit sa pinansiyal nga mga kahinguhaan alang sa tanan. Kini maoy aron sa pagtabang niadtong miadto sa pista gikan sa lagyong kayutaan nga makaestar pa ug dugaydugay kay sa ilang giplano sa sinugdan aron sila dugang nga makakat-on bahin sa ilang bag-ong pagtuo. Busa, kadtong adunay mga kabtangan nagbaligya niini ug nagtugyan sa mga halin ngadto sa mga apostoles aron iapod-apod ngadto sa mga nanginahanglan. “Ang tanan nga nahimong mga magtutuo nagkausa nga ambitan sa tanan ang tanan nilang mga butang.” Apan ang katibuk-ang kahikayan maoy boluntaryo, sumala sa makita sa pangutana ni Pedro ngadto kang Ananias: “Samtang kini nagpabilin diha kanimo dili ba nagpabilin man kining imoha, ug human kini ikabaligya dili ba ilalom man gihapon kini sa imong pagbuot?”​—Buh 2:41-47; 4:​4, 34, 35; 5:4.

Mopatim-aw nga sa ngadtongadto kini nga matang sa hinabang mikunhod, apan ang pagkaon giapod-apod gihapon ngadto sa kabos nga mga babayeng balo diha sa kongregasyon. Maylabot niini, ang nagsultig-Grego nga mga Hudiyo nagbagulbol batok sa nagsultig-Hebreohanon nga mga Hudiyo, “tungod kay ang ilang mga babayeng balo nataligam-an man sa adlaw-adlaw nga pagpang-apod-apod.” Aron masulbad kini nga kahimtang, girekomendar sa mga apostoles nga ang kongregasyon magpili ug pito ka kuwalipikadong mga lalaki nga “puno sa espiritu ug kaalam” aron sa pag-apod-apod sa pagkaon. Ang mga lalaki nga gipili gipaatubang sa mga apostoles kinsa, human sa pag-ampo, nagtudlo kanila. Ang ilang mga buluhaton sa walay duhaduha naglakip sa pagdumala sa mga pondo, pagpamalit, ug sa paghupot ug mga rekord sa pag-apod-apod sa mga suplay nga pagkaon. (Buh 6:1-6) Sa dihang misulat si Pablo sa iyang unang sulat ngadto kang Timoteo, nagpadayon pa gihapon ang kahikayan sa pag-atiman sa mga babayeng balo, sumala sa makita sa iyang instruksiyon  kang Timoteo maylabot niadtong kuwalipikado sa maong pinansiyal nga tabang.​—1Ti 5:3-16.

Gawas pa sa pag-atiman sa mga babayeng balo, ang unang-siglong kongregasyon nag-organisar usab ug mga hinabang alang sa ubang kabos nga mga magtutuo. Sa makausa pa, ang maong giorganisar nga pagpanghatag, bisan tuod gidumala sa tinudlong mga lalaki sa kongregasyon, maoy bug-os nga boluntaryo.​—Buh 11:28-30; Rom 15:25-27; 1Co 16:1-3; 2Co 9:​5, 7; tan-awa ang HINABANG.

Relatibong bili sa materyal nga hinabang. Diha sa Kristohanon Gregong Kasulatan gihatag ang pagdasig nga magmaabiabihon ug magpaambit sa uban, apan dugang pa, ang pagtagana alang sa mga sakop sa kaugalingong pamilya ug ang pagtabang sa kabos nga mga igsoon gipakita nga maoy Kristohanong mga kinahanglanon. (Rom 12:13; 1Ti 5:​4, 8; San 2:​15, 16; 1Ju 3:​17, 18) Ang tim-os nga kahingawa alang sa mga kabos maoy usa ka ilhanan sa matuod nga relihiyon. (San 1:27; 2:1-4) Ngani, sumala sa gipaila ni Jesus, ang pagbuhat ug maayo ngadto sa “labing ubos niining [iyang] mga igsoon” nagpalahi sa “mga karnero” gikan sa “mga kanding.” (Mat 25:31-46) Hinunoa, inay nga mga buhat lamang sa pagkamakitawhanon, ang tabang nga gihatag sa “mga karnero” maoy tungod sa ilang pag-ila sa posisyon sa mga sumusunod ni Kristo.​—Mat 10:40-42.

Aron ang pagpanghatag moresulta sa tinuod nga kalipay sa naghatag, kinahanglang himoon kini nga walay pagbagulbol ug dili kontragusto o pinugos. “Gihigugma sa Diyos ang malipayong maghahatag.” (2Co 9:7; Buh 20:35; 1Pe 4:9) Gawas pa, ang materyal nga mga gasa sa kaluoy dili igo aron makabaton ug kinabuhing walay kataposan ug wala hatagig pangunang pagtagad ni Jesu-Kristo.​—Ju 17:3; 12:1-8.