[Heb., tseviʹ; tsevi·yahʹ (bayeng gasela); tsa·vaʼʹ; tseva·ʼahʹ (bayeng gasela); Gr., dor·kasʹ].

Usa ka matang sa liksi ug madanihong gamay nga antelope o usa. Lagmit nga pamilyar ang karaang mga Hebreohanon sa Gazella dorcas, nga makaplagan sa Arabia, Ehipto, Palestina, ug Sirya. Kini nga hayop maoy mga 1 m (3.5 p) ang gitas-on ug ang barog niini maoy mga 0.6 m (2 p) ang gitas-on hangtod sa abaga. Ang laki ug baye parehong may mga sungay nga pormag letrang U nga morag may naglut-odlut-od nga mga singsing nga moabot ug hangtod sa 0.3 m (1 p) ang gitas-on. Ang kasagarang bulok niini nga gasela maoy hilaw nga kape, nga may dagtom ug pution nga mga budlis sa nawong, ug puti ug kolor ang tiyan ug mga bahin sa sampot niini. Ang mga balhibo niini maoy mugbo ug sinaw. Ang laing matang sa gasela nga tingali nailhan sa mga Israelinhon mao ang medyo dako, dagtomon, kapehon ug bulok nga Gazella arabica.​—HULAGWAY, Tomo 2, p. 955.

Ang katulin sa gasela, nga lakip sa kinatulinan nga mga hayop nga sus-an, gihisgotan sa Kasulatan. (Aw 2:17; 8:14) Ang katulin sa igsoong lalaki ni Joab nga si Asahel ug sa pipila ka Gadhanon gipakasama nianang sa gasela. (2Sa 2:18; 1Cr 12:8) Tungod sa pagkapukan sa Babilonya, gitagna nga ang iyang langyaw nga mga tigpaluyo ug kadtong mga nagsalig kaniya mokalagiw sama sa usa ka gasela ngadto sa ilang kaugalingong mga yuta. (Isa 13:14) Kini nga linalang gihisgotan usab ingong panig-ingnan sa alistong paglihok aron dili malit-agan.​—Pr 6:5.

Lagmit nga tungod sa katahom ug kamadanihon niini, ang gasela gihulagway diha sa pipila ka tin-awng mga kahubitan nga makaplagan sa Awit ni Solomon (2:9; 4:5; 7:3). Ang gasela gihisgotan usab diha sa panumpa diin gipapanumpa sa Sulamita ang mga anak nga babaye sa Jerusalem, nga sa diwa nag-obligar kanila nga tumanon kini atubangan sa tanang butang nga matahom ug madanihon.​—Aw 2:7; 3:5.

Sumala sa Balaod nga gihatag pinaagi kang Moises, ang gasela mahimong kaonon. (Deu 12:​15, 22; 14:​4, 5; 15:22) Usa kini sa mga karne nga kanunayng gitagana alang sa maluho nga pagkaon ni Solomon.​—1Ha 4:​22, 23.