[Pug-anan sa Bino Duol sa Kahoyng Granada].

1. Usa ka siyudad sa Dan (Jos 19:​40, 41, 45) nga gipahat ngadto sa Kohatnong mga Levihanon. (Jos 21:​20, 23, 24) Ang 1 Cronicas 6:66-70 daw naghimo sa Gat-rimon nga usa ka Epraimnon nga siyudad. Apan pinasukad sa samang asoy sa Josue 21:​23, 24, gituohan sa Hebreohanong mga eskolar nga, tungod sa sayop sa magkokopya, ang usa ka bahin sa teksto natangtang ug nahanaw nga wala tuyoa. Busa, sila misugyot nga isal-ot kining mga pulonga (sama sa Jos 21:23) sa dili pa ang  1 Cronicas 6:69: “Ug gikan sa tribo ni Dan, ang Elteke ug ang sibsibanan niini, ang Gibeton ug ang sibsibanan niini . . . ” Lagmit nga mao kini ang orihinal nga mabasa. Hinuon, dili angayng sayloan ang posibilidad nga ang Gat-rimon maoy usa ka sakop nga siyudad sa Dan nga nahimutang sa teritoryo sa Epraim.

Gituohan sa kadaghanan nga ang Gat-rimon mao ang Tell Jerisheh (Tel Gerisa), mga 8 km (5 mi) sa AS sa modernong Tel Aviv-Yafo.

2. Usa ka siyudad sa Manases nga gihatag ngadto sa Kohatnong mga Levihanon. (Jos 21:​20, 25) Sanglit ang mabasa sa susamang asoy sa 1 Cronicas 6:70 maoy “Bileam,” gituohan sa daghang eskolar nga ang Bileam mao ang orihinal nga makita diha sa Josue 21:25 inay nga Gat-rimon.​—Tan-awa ang IBLEAM.