[Bungtod].

Usa ka siyudad sa Benjamin nga gihatag ngadto sa mga Kohatnon; usa sa 13 ka siyudad sa mga saserdote. (Jos 18:​21, 24; 21:​17, 19; 1Cr 6:​54, 60) Ang Geba lagmit nga nahimutang sa amihanang utlanan sa gingharian sa Juda, nga tungod niana namugna ang ekspresyon nga “gikan sa Geba hangtod sa Beer-seba.” (2Ha 23:8) Ang karaang siyudad sagad gituohan nga mao ang balangay sa Jabaʽ, halos 9 km (5.5 mi) sa AAS sa Patukoranan sa Templo didto sa Jerusalem. Ang usa ka titip nga walog nag-ulang niini nga dapit gikan sa gituohang nahimutangan sa karaang Mikmas. Niini nga walog dihay duha ka bungtod nga may titip nga dagkong mga bato sa mga kiliran niini. Kini tingali mao ang ‘samag-ngipon nga dagkong mga bato,’ ang Bozez ug Sene, nga ang usa “nag-atubang sa Mikmas” ug ang lain “nag-atubang sa Geba.”​—1Sa 14:​4, 5.

Ang Geba maoy usa sa mga siyudad nga gihisgotan sa pagpakiggubat ni Haring Saul sa mga Filistehanon. Dayag nga tungod sa sugo sa iyang amahan nga si Saul, gipukan ni Jonatan ang “garison” sa mga Filistehanon didto sa Geba. (1Sa 13:​3, 4) Agig balos, ang mga Filistehanon nagtigom ug usa ka dakong pundok sa kasundalohan didto sa Mikmas, nga tungod niana daghang Israelinhon ang nanago sa kahadlok, ang uban nangalagiw pa gani tabok sa Jordan. (1Sa 13:5-7) Sa ulahi, gikan sa Geba si Jonatan miadto sa nagkampong kasundalohan sa mga Filistehanon, nga sa walay duhaduha nahimutang diha sa daplin sa “lugot nga agianan sa Mikmas.” Si Jonatan mikatkat sa titip nga agianan paingon sa nagkampong kasundalohan ug, pinaagi sa tabang sa iyang tigdala sa armadura, mipatay ug mga 20 ka Filistehanon.​—1Sa 14:6-14; itandi ang 1Sa 13:​16, 23.

Katuigan sa ulahi, gipalig-on ni Asa ang Geba pinaagig mga bato ug mga kahoy sa Rama. (1Ha 15:22; 2Cr 16:6) Sa usa ka panahon nga wala ibutyag sa Bibliya, ang pipila ka molupyo sa Geba gidestiyero ngadto sa Manahat. (1Cr 8:6) Sa pagpaingon sa Jerusalem, ang kasundalohan sa Asirya ilalom ni Senakerib lagmit miagi sa Geba. (Isa 10:​24, 28-32) Lakip sa mga Hudiyo nga namalik gikan sa pagkadestiyero sa Babilonya mao ‘ang mga anak sa Geba’; kini nga siyudad mismo gipuy-an pag-usab human sa maong pagpamalik. (Esd 2:​1, 26; Neh 7:​6, 30; 11:31; 12:29) Nagpunting sa pagmaya tungod sa pagkatukod pag-usab sa Jerusalem, ang manalagna nga si Zacarias naghisgot nga mapaubos sama sa Araba ang bungtoron ug bukirong yuta nga nahimutang taliwala sa Geba ug Rimon.​—Zac 14:10; tan-awa ang GIBEA Num. 2.