[Si Jehova Maoy Dako].

1. Usa ka Levihanong mag-aawit kinsa, sa panahon ni David, gitudlo pinaagig ripa nga maoy manguna sa ikaduha sa 24 ka grupong tig-alagad nga may 12 ka maghohoni matag grupo.​—1Cr 25:​3, 9, 31.

2. Apohang lalaki sa manalagna nga si Sofonias ug lagmit usa ka kaliwat ni Haring Ezequias.​—Sof 1:1.

3. Anak nga lalaki ni Pasur; usa sa mga prinsipe sa Jerusalem nga nag-akusar kang Jeremias sa atubangan ni Haring Zedekias nga siya maoy nagpaluya sa mga tawong manggugubat ug sa tanang katawhan ug nag-awhag nga si Jeremias patyon tungod niini. Sa dihang gitugotan sa hari, kini nga mga prinsipe naghulog kang Jeremias sa usa ka lapokong atabay.​—Jer 38:1-6.

4. Ang “anak nga lalaki ni Ahikam nga anak nga lalaki ni Sapan.” Human sa pagkalaglag sa Jerusalem niadtong 607 W.K.P., gitudlo ni Haring Nabucodonosor si Gedalias ingong gobernador sa nahibiling mga Hudiyo didto sa yuta sa Juda. Gihimo ni Gedalias ang Mizpa nga iyang pinuy-anan, ug dinhi mipuyo ang manalagna nga si Jeremias. Unya ang mga pangulo sa kasundalohan sa Juda nga nakaikyas sa pagbihag, sa dihang ilang nadunggan nga si Gedalias natudlo ingong gobernador, miadto kaniya uban sa ilang mga tawo didto sa Mizpa. Si Gedalias nagpasalig kanila, ilalom sa panumpa, nga maayo ra ang ilang dangatan basta padayon lang silang mag-alagad sa hari sa Babilonya, ug siya nagdasig kanila sa pagtigom ug bino, lana, ug mga prutas sa ting-init. Bisan ang mga Hudiyo nga natibulaag sa Moab, Ammon, Edom, ug sa ubang mga dapit padayong nangadto kang Gedalias.

Dayag nga kining tanan wala magustohi ni Baalis nga hari sa Ammon, kinsa nagmalamposon sa pagkuha sa kooperasyon ni Ismael alang sa usa ka planong pagpatay kang Gobernador Gedalias. Sa pagkasayod niini, si Johanan ug ang ubang mga pangulo sa kasundalohan nagpahibalo sa gobernador mahitungod niini, apan wala siya motuo kanila. Si Johanan sekreto pa ganing miduol kang Gedalias ug mitanyag nga pakyason ang laraw pinaagi sa pagpatay kang Ismael. Apan si Gedalias wala mamati niini, nga naghunahuna nga butangbutang lang kini bahin kang Ismael. Busa sa dihang si Ismael miadto sa Mizpa uban sa napulo pa ka tawo, si Gedalias wala ra magbantay. Siya nakigsalo sa pagpangaon uban kanila; ug samtang sila nangaon, si Ismael ug ang mga tawo nga kauban niya mitindog ug mipatay kang Gedalias maingon man sa tanang mga Hudiyo ug mga Caldeanhon nga kauban ni Gedalias.​—2Ha 25:22-25; Jer 39:14; 40:5–​41:3.

 5. Usa sa mga saserdote sa panahon ni Esdras nga lakip niadtong nagkuhag langyawng mga asawa ug misaad sa pagpapahawa kanila.​—Esd 10:​18, 19.