Usa ka tig-alagad ni Eliseo nga manalagna.

Sa dihang naghunahuna si Eliseo kon unsay buhaton alang sa usa ka maabiabihong babaye nga Sunaminhon, si Gehazi mao ang nagpahibalo sa iyang agalon nga ang maong babaye walay anak ug nga ang iyang bana tigulang na. Busa, giingnan siya ni Eliseo nga siya gantihan ug usa ka anak nga lalaki. Mga tuig sa ulahi ang milagrosong gihatag nga batang lalaki nasakit ug namatay. Tungod niana ang Sunaminhon misakay ug asna aron makigkita kang Eliseo didto sa Bukid sa Carmelo ug migunit sa iyang tiil. Sa pagkakita niini, si Gehazi misulay sa pagtulod kaniya apan gitambagan nga pasagdan lang siya. Human mosulti ang babaye, dihadiha gipaadto pag-una ni Eliseo si Gehazi ngadto sa batang lalaki, samtang si Eliseo ug ang babaye misunod. Sa ilang pagpaingon didto gisugat sila ni Gehazi nga nagtaho nga, bisag iyang gibutang ang sungkod ni Eliseo sa ibabaw sa nawong sa bata, “ang batang lalaki wala momata.” Apan, wala madugay human sa iyang pag-abot, gibanhaw ni Eliseo ang anak sa Sunaminhon.​—2Ha 4:12-37.

Sa ulahi, tungod kay hapit nang moabot ang pito-ka-tuig nga gutom, giawhag ni Eliseo ang Sunaminhon ug ang iyang panimalay nga mopuyo ingong langyaw sa bisan asa nga dapit nga mahimong kapuy-an. Human sa gutom, siya mibalik sa Israel gikan sa Filistia ug miduol sa hari ug mihangyo nga iuli kaniya ang iyang balay ug ang iyang yuta. Naatol usab nga niadtong tungora giasoy ni Gehazi ngadto sa hari kon giunsa ni Eliseo pagbanhaw ang anak nga lalaki sa maong babaye. Sa pagkadungog sa kaugalingong asoy sa Sunaminhon bahin niini, ang hari miingon nga ang tanan igauli kaniya, lakip ang tanang abot sa iyang uma sa dihang wala siya.​—2Ha 8:1-6.

Ang kadalo alang sa hakog nga ganansiya mao ang nakapukan kang Gehazi. Maylabot kini sa pag-ayo kang Naaman nga Siryanhon. Bisag midumili si Eliseo sa pagdawat ug gasa gikan kang Naaman tungod sa pag-ayo sa iyang sanla (2Ha 5:14-16), gikaibgan ni Gehazi ang gasa ug nangatarongan nga haom lamang ang pagdawat niini. Busa, iyang giapas si Naaman ug, sa ngalan ni Eliseo, gipangayo ang usa ka talanton nga plata (nagkantidad ug $6,606) ug duha ka ilisan nga besti, nga nagpasumangil nga kini maoy alang sa duha ka batan-ong lalaki sa mga anak sa mga manalagna nga bag-o pang miabot gikan sa bukirong rehiyon sa Epraim. Si Naaman malipayong naghatag kaniya dili lamang sa usa ka talanton kondili sa duha ka talanton nga plata, ug maingon man sa duha ka ilisan nga besti, ug nagsugo sa duha sa iyang mga tig-alagad sa pagdala sa gasa alang kang Gehazi. Sa Opel, gikuha ni Gehazi ang gasa gikan sa mga kamot sa mga tig-alagad, gipalakaw sila, gitagoan ang gasa didto sa iyang balay, ug dayon miadto nga walay dala atubangan kang Eliseo, gani milimod pa nga siya milakaw sa dihang gipangutana: “Diin ka ba gikan, Gehazi?” Ingong resulta, gisanla si Gehazi. Busa ang kadalo ni Gehazi, inubanan sa iyang pagkamalimbongon, maoy nakapawala sa iyang pribilehiyo nga magpadayon sa pag-alagad ingong tig-alagad ni Eliseo, gawas pa sa sanla nga naagoman niya ug sa iyang kaliwat.​—2Ha 5:20-27.