ANG yuta nga gihatag sa Diyos ngadto sa karaang Israel adunay talagsaon ug nagkalainlain nga geograpikanhong dagway. Sa amihanan anaa ang mga taluktok sa kabukiran nga naputos sa niyebe; ang mga dapit sa habagatan maoy tropikanhon. Sulod sa mga utlanan niini anaa ang mabungahong ubos nga kayutaan, kabungtoran alang sa mga prutasan ug mga sibsibanan sa kahayopan, maingon man mga dapit sa awaaw nga kamingawan. Dinhi niining gamay nga luna makita ang nagkalainlaing dagway sa yuta.

Ubay sa utlanan sa sidlakang tumoy sa Dagat Mediteranyo dihay usa ka hiktin nga luna sa tabunok nga patag. Sa sidlakan niini mao ang Sepela, ang bungtorong ubos nga kayutaan diin gitikad ang mga parasan ug kaolibohan. Sa unahan pa dapit sa sidlakan, may usa ka kutay sa kabukiran latas sa tibuok gitas-on sa yuta nga sama sa usa ka dakong dugokan. Dayon ang yuta titip nga midulhog ngadto sa Rift Valley, nga nagpikas sa yuta sa tibuok gitas-on niini. Agi niini nga walog ang Suba sa Jordan miagos nga palikoliko gikan sa Dagat sa Galilea paingon sa Dagat sa Asin. Sa sidlakan sa Jordan adunay tabunok nga kabungtoran ug sibsibanang mga dapit. Saylo niining maanindot nga yuta, dapit sa sidlakan, nagsugod ang Desyerto sa Arabia.

Niadtong nindot pa kaayo kini, ang Yutang Saad uban sa tanang kadaiyahan niini maoy sama sa tanaman sa Eden. Busa ang Israel nagtaganag usa ka gamayng pasiunang talan-awon kon unsay kahulogan sa Paraiso ilalom sa Gingharian sa Diyos alang sa katawhan sa tanang bahin sa yuta.