[lagmit, Kabungtoran].

Usa ka bukid nga gituohan sumala sa tradisyon nga mao ang Jebel Fuquʽah, usa ka kurbadong tagaytay sa anapog nga mga bungtod nga nahimutang sa HS sa Jezreel ug sa K sa Bet-sean. Tungod sa mga lugot niini, ang kabukiran nabahin ngadto sa ubay-ubayng kapatagan ibabaw sa bukid. Ang dakong bahin niini maoy kabatoan, nga may gansangong mga agianan sa tubig dapit sa amihanan ug sa kasadpan nga mga bahin, diin ang mga bato nga tisas nakankan. Apan ang trigo ug sebada gitanom diha sa hanayhay nga mga bakilid sa kasadpan. Lain pa, makaplagan didto ang mga sibsibanan ingon man ang mga kahoyng igos ug olibo. Ang amihanang bahin niini maoy titip ug habog kaayo, nga moabot ug mga 520 m (1,700 p) ibabaw sa lebel sa dagat.  

Tungod sa maayong lokasyon niini diha sa tabunok nga Patag sa Jezreel tali sa bul-oganang walog sa Kison ug sa Walog sa Jordan, ang Gilboa nalangkit sa labing menos duha ka dagkong mga gubat. Duol sa “atabay ni Harod,” nga sagad giisip nga mao ang tubod nga nahimutang sa AK nga lawis sa Gilboa, nagkampo si Gideon ug ang iyang mga tawo. (Huk 7:1) Sa ulahi, si Haring Saul nagtigom sa iyang kasundalohan sa Gilboa ug didto nakaagom ug kapildihan sa mga kamot sa mga Filistehanon. Didto usab gipatay ang tulo sa iyang mga anak nga lalaki, si Jonatan, Abinadab, ug Malki-sua, ug didto usab si Saul naghikog.​—1Sa 28:4; 31:1-4, 8; 2Sa 1:4-10, 21; 1Cr 10:1-8.