1. Usa ka rehiyon sa Ehipto diin nagpuyo ang mga Israelinhon sulod sa 215 ka tuig (1728-1513 W.K.P.). (Gen 45:10; 47:27) Bisag ang tukmang nahimutangan sa Gosen dili matino, mopatim-aw nga kini nahimutang sa sidlakang bahin sa Delta sa Nilo, ang bokana paingon sa sentro sa Ehipto. Gipaila kini sa kamatuoran nga si Jose, human mobiya sa iyang gipuy-an sa Ehipto, misugat sa iyang amahan (kinsa mipanaw gikan sa Canaan) didto sa Gosen. (Gen 46:​28, 29) Ang mga hubad sa Gregong Septuagint nagpaila nga ang Gosen anaa sa kasilinganan sa Wadi Tumilat.

Si Paraon adunay binuhing mga hayop sa Gosen, ug ang mga Hebreohanon nagpasibsib usab sa ilang panon sa mga karnero ug panon sa mga baka didto. (Gen 47:​1, 4-6; 50:8) Ang paghubit sa rehiyon ingong ‘ang kinamaayohan sa yuta sa Ehipto’ lagmit nga usa ka ekspresyon nga nagkahulogang ang labing tabunok nga yutang sibsibanan, nga haom gayod sa kon unsay panginahanglan sa banay ni Jacob. Ang Gosen lagmit mao ra usab ang “yuta sa Rameses.” (Gen 47:​6, 11) Sugod sa ikaupat nga hampak sa Ehipto, si Jehova espesipikong nagpinig sa “Gosen” nga dili pagadaoton.​—Ex 8:22; 9:26.

2. Usa ka siyudad sa bukirong rehiyon sa Juda. (Jos 15:​20, 48, 51) Gituohan sa ubang mga eskolar nga mao kini ang Edh Dhahiriya, mga 18 km (11 mi) sa HK sa Hebron. Ang “yuta sa Gosen” nga gihisgotan sa Josue 10:41 ug 11:16 mopatim-aw nga usa ka distrito nga anaa sa kasilinganan niini. Kini nga distrito naglakip sa bukirong rehiyon tali sa Hebron ug sa Negeb.