Ang hilabihan nga kanihit sa pagkaon; lain pa, ang kakulang sa pagkadungog sa mga pulong ni Jehova, sa ato pa, usa ka espirituwal nga gutom. (Am 8:11) Ang gutom maoy usa sa mga hampak nga modangat sa simbolikong Dakong Babilonya.​—Pin 18:8.

Mga Hinungdan ug mga Epekto sa Gutom. Ang hulaw, malaglagong mga ulan nga yelo (Ex 9:23-25), mga dangan, makapagba nga kainit ug agup-op sa mga tanom, ingon man usab ang gubat, maoy lakip sa komon nga mga hinungdan sa gutom sa kapanahonan sa Bibliya. (Am 4:7-10; Hag 2:17) Ang mga dulon, nga usahay mohugpa nga hilabihan ka daghan, ilabinang malaglagon sa mga tanom. (Ex 10:15) Usahay ang suliran maoy dili ang pagkawalay ulan, kondili ang pag-ulan sa dili-hustong panahon, sama sa pag-ulan panahon sa pag-ani sa trigo o sebada.​—Itandi ang Lev 26:4; 1Sa 12:​17, 18.

Ang temporaryo nga kagutom maoy kinaiyanhon, apan ang dugay nga kagutom, sama sa panahon sa gutom, makadaot kaayo sa mental ug sa pisikal nga kahimsog. Kini makalipong, makaluya sa emosyon, ug makahabol sa pangisip. Ang tinguha sa pagkaon mao ray anaa sa hunahuna. (Itandi ang Ex 16:3.) Mawala ang mga sukdanan sa moral. (Itandi ang Isa 8:21.) Ang pagkagutom makaapekto sa paggawi sa usa ka tawo, nga mosangpot sa pagpangawat, pagpatay, ug bisan gani sa kanibalismo. Ang gutom sagad nga ubanan ug mga sakit ug mga epidemya tungod sa pagkaluya niadtong naapektohan.​—Itandi ang Deu 32:24.

Mga Gutom sa Kakaraanan. Ang unang tinuod nga makasaysayanhong gutom mao ang gutom nga nagpugos kang Abram (Abraham) nga mobiya sa Canaan ug mopuyo sa Ehipto ingong langyaw. (Gen 12:10) Sa adlaw ni Isaac nahitabo ang laing gutom, apan gisultihan siya ni Jehova nga dili moadto sa Ehipto. (Gen 26:​1, 2) Ang pito-ka-tuig nga gutom nga midangat sa Ehipto samtang si Jose nag-alagad ingong primer ministro ug tagdumala sa pagkaon didto lagmit miabot saylo pa sa mga utlanan sa Ehipto, kay “ang katawhan sa tibuok yuta miadto sa Ehipto sa pagpalit [ug pagkaon] gikan kang Jose.”​—Gen 41:54-57.

Bisan tuod ang Ehiptohanong mga inskripsiyon tinuyong naglikay sa paghisgot sa temporaryong pagpuyo sa Israel didto sa Ehipto, adunay karaan nga Ehiptohanong mga sinulat nga naghubit sa mga yugto sa gutom tungod sa kakulang sa tubig sa Suba sa Nilo. Ang usa ka sinulat naghubit sa usa ka yugto nga pito ka tuig nga mabaw ang tubig sa Nilo ug nga misangpot sa gutom. Sumala sa asoy,  ang pipila ka bahin sa yuta gihatag ngadto sa mga saserdote sa dihang ang kahupayan gikan sa gutom miabot na. Bisan tuod may pagduhaduha nga ang dokumento maoy “usa ka palsipikasyon nga gihimo sa mga saserdote sa ulahing yugto, aron ipakamatarong ang ilang pagbaton ug mga teritoryo,” sa gihapon atong nakita nga nabanaag ang usa ka tradisyon sa usa ka yugto sa pito ka tuig nga gutom.​—Ancient Near Eastern Texts, giedit ni J. Pritchard, 1974, p. 31.

Sa wala pa mosulod ang Israel sa Yutang Saad, si Jehova pinaagi kang Moises nagpasalig kanila nga sila makabaton ug dagayang pagkaon kon sila magpadayon sa pag-alagad Kaniya nga matinumanon. (Deu 28:​11, 12) Bisan pa niana, ang gutom mahimong usa sa makahahadlok nga mga resulta nga modangat sa Israel tungod sa pagkadili-matinumanon. (Deu 28:​23, 38-42) Ang usa ka gutom sa mga adlaw sa mga Maghuhukom nagtukmod sa bana ni Noemi nga si Elimelek sa Betlehem nga mopuyo didto sa Moab uban sa iyang pamilya ingong langyaw. (Ru 1:​1, 2) Si Jehova nagpadangat ug tulo-ka-tuig nga gutom sa yuta sa Israel sa adlaw ni David tungod sa pagkasad-an sa dugo sa balay ni Saul maylabot sa mga Gabaonhon. (2Sa 21:1-6) Ang tulo ug tunga ka tuig nga hulaw misangpot sa grabeng gutom nganha sa dili-matinumanong Israel ingong tubag sa pag-ampo ni Elias. (San 5:17; 1Ha 17) Dugang pa sa mga gutom sa adlaw ni Eliseo, dihay gutom nga misangpot tungod sa Siryanhong paglikos sa Samaria, nga sa maong panahon dihay giasoy nga usa ka hitabo sa kanibalismo.​—2Ha 4:38; 8:1; 6:24-29.

Bisan tuod nga ang mga manalagna sa Diyos nagpasidaan nga ang apostasya magdalag kamatayon pinaagig gutom, kamatay, ug espada, ang dili-matinumanong mga taga-Juda mipalabi sa pagpatalinghog sa ilang mini nga mga manalagna, kinsa nagpasalig kanila nga dili modangat ang maong kalamidad. (Jer 14:11-18; Eze 5:12-17) Bisan pa niana napamatud-ang tinuod ang mga pulong sa mga manalagna sa Diyos. Grabe kaayo ang gutom didto sa Jerusalem sa panahon sa paglikos sa mga Babilonyanhon (609-607 W.K.P.) nga tungod niana gilat-an ug gikaon sa mga babaye ang ilang kaugalingong mga anak.​—Lam 4:1-10; 5:10; 2Ha 25:1-3; Jer 52:4-6; itandi ang Deu 28:51-53.

Pinaagi ni manalagnang Joel, si Jehova nagpasidaan sa Israel labot sa usa ka grabeng hampak sa mga insekto nga maglaglag sa yuta ug magpahinabog grabeng gutom sa dili pa moabot “ang adlaw ni Jehova.”​—Joe 1.

Kasiglohan sa ulahi, ang mga kanihit sa pagkaon gitagna ni Jesus ingong lakip sa mga hitabo nga magtimaan sa kataposan sa “sistema sa mga butang.” (Mat 24:​3, 7; itandi ang Pin 6:​5, 6.) Ingon sa gipahibalo daan ni Agabo, usa ka Kristohanong manalagna, ang usa ka dakong gutom nahitabo sa panahon ni Emperador Claudio (41-54 K.P.). (Buh 11:28) Pipila ka tuig una pa niana, sa tuig 42 K.P., ang usa ka grabeng gutom mihapak sa Ehipto, diin didto daghang Hudiyo ang namuyo. Ug midangat ang “dakong kawalad-on” sa Judea ug Jerusalem sa dihang gilikosan sa Romanhong kasundalohan ubos ni Heneral Tito ang Jerusalem ug sa kataposan gilaglag kini niadtong 70 K.P. (Luc 21:23) Giasoy ni Josephus ang grabeng gutom sa siyudad, diin ang mga tawo mikaon na lamang sa mga panit, sagbot, ug dagami, ug sa usa ka higayon, giasal pa gani ug gikaon sa usa ka inahan ang iyang anak nga lalaki. (The Jewish War, VI, 193-213 [iii, 3, 4]) Apan, sa dihang gitagna ang maong mga kanihit sa pagkaon, gipakita ni Jesus nga ang anaa sa iyang hunahuna dili lamang ang mga hitabo nga modangat sa dili pa laglagon ang Jerusalem kondili ang mga hitabo usab nga modangat inigbalik sa Anak sa tawo diha sa himaya sa iyang Gingharian.​—Luc 21:​11, 27, 31; itandi ang Pin 6:​5, 6.

Kagawasan Gikan sa Gutom. Gipasalig ni Kristo Jesus nga ang pag-ampo sa matinumanong mga alagad alang sa ilang tinapay sa adlaw-adlaw pagatubagon sa Diyos ug nga kadtong nag-una sa Gingharian sa Diyos pagatagan-an. (Mat 6:​11, 33; itandi ang Sal 33:19; 37:​19, 25.) Bisan pa niana, tungod sa pagsupak ug paglutos, gipakita ni Jesus nga ang iyang mga alagad mahimong mag-antos usahay sa gutom. (Mat 25:​35, 37, 40) Giasoy mismo ni apostol Pablo ang iyang daghang mga pag-antos tungod sa kagutom ug kauhaw samtang nakigbahin sa ministeryo ubos sa malisod nga mga kahimtang. (1Co 4:11-13; 2Co 11:27; Flp 4:12) Apan siya mipahayag ug pagsalig nga ang pisikal nga kagutmanan dili makapabulag sa matinumanong mga alagad sa Diyos gikan sa nagapalig-ong gugma sa Diyos.​—Rom 8:​35, 38, 39; itandi ang Luc 6:25.

Kadtong sa hustong paagi gigutom ug giuhaw alang sa pagkamatarong ug sa kamatuoran kanunayng pagabusgon sa espirituwal. (Mat 5:6; Ju 6:35) Kini naglakip niadtong sakop sa “dakong panon” kinsa adunay paglaom nga maluwas sa “dakong kasakitan” ug nga bahin kanila kini gisulat nga “sila dili na gutomon ni uhawon pa.” (Pin 7:​9, 13-17) Ug ubos sa pagmando sa Gingharian sa Diyos moabot usab unya ang kadagaya aron tagbawon ang pisikal nga kagutom sa tanang katawhan.​—Sal 72:16; Isa 25:6.