Usa ka inspiradong basahon sa Hebreohanong Kasulatan nga gitala lakip sa gitawag nga gagmayng mga manalagna. Kini gilangkoban sa upat ka mensahe gikan kang Jehova ngadto sa mga Hudiyo nga nahibalik gikan sa pagkadestiyero sa Babilonya, nga nag-awhag kanila sa pagtapos sa pagtukod pag-usab sa templo sa Jerusalem. Sanglit usa usab ka basahon sa mga tagna, gitagna niini ang pagpuno sa balay ni Jehova sa himaya ug ang pagpukan sa tawhanong mga gingharian.​—Hag 2:​6, 7, 21, 22.

Ang Magsusulat ug ang Pagkakanonikal Niini. Ang magsusulat mao si Haggeo nga manalagna, kinsa personal nga nagsulat sa matag mensahe nga makaplagan diha sa basahon. (Hag 1:1; 2:​1, 10, 20; tan-awa ang HAGGEO.) Bisan tuod ang basahon ni Haggeo wala sa espesipiko gitala nga lakip sa kadaghanan sa karaang mga katalogo sa Kasulatan, kini dayag nga gilakip diha sa ilang mga paghisgot sa ‘napulog-duha ka Gagmayng mga Manalagna,’ sa ingon nakompleto ang gidaghanon nga 12. Wala gayod kuwestiyona sa mga Hudiyo nga lakip kini sa Hebreohanong Kasulatan, ug ang pagkakanonikal sa basahon napamatud-an gayod tungod kay gikutlo sa Hebreohanon 12:26 ang Haggeo 2:6.​—Itandi ang Hag 2:21.

Estilo. Yano ang mga pulong nga gigamit ug daling masabtan. Usahay gibangon niini ang makapatukbil sa hunahuna nga mga pangutana. (Hag 1:​4, 9; 2:​3, 12, 13, 19) Ang basahon ni Haggeo naundan ug kusganong pagbadlong, pagdasig, ug tagna nga puno ug paglaom. Ang balaang ngalan nga Jehova makita sa 35 ka higayon diha sa 38 ka bersikulo niini, ug kini tin-awng nagpakita nga ang mga mensahe maoy gikan sa Diyos, ug si Haggeo nag-alagad ingong Iyang tinudlong mensahero.​—1:13.

Kon Kanus-a Gisulat ug ang mga Kahimtang Panahon sa Pagsulat. Ang upat ka mensahe nga girekord ni Haggeo gipahayag didto sa Jerusalem sulod sa yugto nga mga upat ka bulan sa ikaduhang tuig sa Persianhon nga si Haring Dario Hystaspis (520 W.K.P.), ug ang basahon dayag nga nahuman niadtong 520 W.K.P. (Hag 1:1; 2:​1, 10, 20) Si Zacarias nanagna usab nga may samang katuyoan sa panahon sa pagpanagna ni Haggeo.​—Esd 5:​1, 2; 6:14.

 Mga Mensahe nga May Dumalayong Kaayohan. Lakip sa ubang mga butang, ang basahon ni Haggeo nagdasig ug pagtuo kang Jehova, nga hinungdanon sa mga alagad sa Diyos. Kini nagpakita nga ang Diyos nagauban sa iyang katawhan (Hag 1:13; 2:​4, 5), ug kini nag-awhag usab kanila sa pag-una sa iyang mga intereses diha sa ilang kinabuhi. (Hag 1:2-8; Mat 6:33) Gipatin-aw sa basahon nga ang pormalistiko nga pagsimba dili makapahimuot kang Jehova (Hag 2:10-17; itandi ang Isa 29:​13, 14; Mat 15:7-9) apan ang matinumanong mga buhat nga nahiuyon sa kabubut-on sa Diyos mao ang moresultag panalangin. (Hag 2:​18, 19; itandi ang Pr 10:22.) Ang magsusulat sa basahon sa Bibliya sa Mga Hebreohanon nag-ingon nga ang Haggeo 2:6 nakabaton ug mas dakong katumanan diha sa Gingharian sa Diyos ubos sa mga kamot ni Jesu-Kristo.​—Heb 12:26-29.

[Kahon sa panid 937]

MGA PANGUNANG PUNTO SA HAGGEO

Upat ka mensahe nga gituyo aron dasigon ang mga Hudiyo nga mopadayon sa pagtukod pag-usab sa templo ni Jehova

Gisulat didto sa Jerusalem 17 ka tuig human makabalik ang mga Hudiyo gikan sa pagkadestiyero, sa dihang wala pa matapos ang pagtukod sa templo

Mensahe ngadto sa mga tawo nga nagpuyo sa mga balay nga plinigohan, samtang ang balay ni Jehova guba (1:​1-15)

Giingnan ni Jehova kadtong miingon nga dili kadto ang panahon nga tukoron pag-usab ang templo nga iyang gihikaw ang panalangin kanila tungod sa ilang pagbalewala niini nga buluhaton, mao nga nihit ang mga ani ug gamay rag suhol ang sinuholang mga mamumuo

Si Zorobabel, Josue, ug ang uban pa sa katawhan misanong; gisaaran sila nga si Jehova magauban kanila sa pagtukod pag-usab sa templo; ang buluhaton sa templo nagsugod

Ang pahayag nga pun-on ni Jehova sa himaya ang iyang balay (2:​1-9)

Sa panglantaw sa mga tigulang nga nakakita sa himaya sa templo ni Solomon, ang bag-ong tinukod daw walay bili

Giawhag ni Jehova si Zorobabel, Josue, ug ang uban pa sa katawhan nga magmalig-on, dili maluya sa kasingkasing, magpadayon sa buluhaton, ug nagpasalig kanila nga ang himaya sa natukod pag-usab nga templo molabaw pa sa kanhing templo

Gipakita ngadto sa katawhan nga ang pagbalewala sa pagtukod pag-usab sa templo naghimo kanila ug sa tanan nilang buluhaton ingong mahugaw atubangan sa Diyos (2:​10-19)

Gitubag sa mga saserdote ang mga pangutana nga nag-ingon nga ang pagkabalaan dili ikapasa apan ang kahugawan ikapasa

Si Jehova nagdasig sa katawhan pinaagi sa pagpahibalo nga sukad sa adlaw nga ipahiluna ang patukoranan sa templo, si Jehova maghatag sa iyang panalangin, nga magtapos sa nihit nga mga ani

Mensahe ngadto kang Zorobabel bahin sa pag-uyog ni Jehova sa mga langit ug sa yuta (2:​20-23)

Sa dihang uyogon ni Jehova ang mga langit ug ang yuta, ug pukanon ang trono sa mga gingharian, gamiton sa mga kaaway ang ilang mga hinagiban nga batok ra usab sa ilang kaugalingon; sa ingon walay gahom nga molampos sa pagbabag sa pagtukod pag-usab sa templo

Himoon ni Jehova si Zorobabel nga sama sa iyang kaugalingong timbre nga singsing, busa magsilbing garantiya nga ang iyang posisyon maoy segurado bisan unsa pay mahitabo