Ang Hebreohanong mga pulong nga gihubad nga “hampak” adunay literal nga kahulogang “paghilabot,” “pagpatay,” “paghampak,” “kapildihan,” ug “kamatayon.” Si Jehova nga Diyos naghampak ingong silot sa mabatokong pagbagulbol (Num 16:41-50), sa dili pagtuman sa iyang kabubut-on (Zac 14:​12, 15, 18), sa pagpanamastamas sa butang nga sagrado (1Sa 5:1–​6:4), sa paghilabot sa iyang mga dinihogan (Gen 12:17; Sal 105:15), ug sa pagkadili-matinumanon o paglapas sa iyang balaod (Lev 26:21; Num 14:​36, 37; 31:16; Deu 28:59-61; 1Cr 21:​17, 22; 2Cr 21:12-15). Ang maong mga hampak mahimong ipahamtang pinaagi sa mga manulonda o sa mga tawo. (2Sa 24:17; Jer 19:​1-8; 25:​8, 9; 49:17; 50:​13, 14) Ang mga pangaliya sa mga alagad ni Jehova o ang tim-os nga mga pag-ampo sa mga mahinulsolon gikinahanglan aron mawala ang mga hampak nga gipadangat sa Diyos.​—Gen 20:​17, 18; 1Ha 8:​37, 38; 2Cr 6:​28, 29.

Ang usa ka hampak mahimong resulta usab sa kinaiyanhong epekto sa sala sa usa ka tawo. (Pr 6:​32, 33) Mahimo nga kini usa ka balatian, sama sa “hampak nga sanla” (Lev 13:2), o usa ka kasakitan gumikan sa panahon ug sirkumstansiya.​—Sal 38:11; 73:​5, 14.

Ang mga hampak nga gipahinabo ni Jehova sa Ehipto sa panahon ni Moises maoy mga kapadayagan sa iyang dakong gahom ug aron mamantala ang iyang ngalan taliwala sa kanasoran. (Ex 9:​14,  16) Ang mga epekto niini gihisgotan pa gihapon sa ubang katawhan sa misunod nga mga kaliwatan. (Jos 2:9-11; 9:9; 1Sa 4:8; 6:6) Dugang pa, kini nga mga hampak nagpamatuod nga ang mga diyos sa Ehipto walay gahom.​—Ex 12:12; Num 33:4; tan-awa ang DIYOS UG MGA DIYOSA, MGA (Ang Napulo ka Hampak); MOISES (Atubangan ni Paraon sa Ehipto).

Ang mga hampak (Gr., ple·gaiʹ) nga gihisgotan sa basahon sa Pinadayag tataw nga maoy mga kapahayagan sa kasuko sa Diyos ug sa simbolikong paagi nagtumong sa resulta o epekto sa iyang hudisyal nga mga hukom.​—Pin 9:​18, 20; 11:6; 15:​1, 6, 8; 16:​9, 21; 18:​4, 8; 21:9; 22:18.