Ang Hebreohanong pulong nga ruʹach, nga kasagarang gihubad nga “espiritu,” mahimong magpasabot usab sa naghuros nga hangin. (Ecc 1:6) Ang ubang Hebreohanong mga termino ug ekspresyon mahimong hubaron nga “unos” (Sal 148:8; Os 8:7), “bagyo,” “bagyo nga nagaalimpulos” (Jer 25:32; 23:19), ug “alimpulos” (2Ha 2:11). Bisan tuod sa Juan 3:8 ang pneuʹma (kasagarang gihubad nga “espiritu”) nagkahulogang “hangin,” ang Gregong termino nga aʹne·mos mao ang mas subsob nga gigamit alang sa hangin. (Mat 7:​25, 27; 11:7; Ju 6:18) Ang “mahuyohoy nga bahin [Heb., ruʹach] sa adlaw” mopatim-aw nga nagpunting sa mga takna sa kahaponon sa dili pa mosalop ang adlaw, sa dihang ang makarepreskong bugnaw nga huyohoy sagad nga mohuyop diha sa rehiyon diin ang tanaman sa Eden gituohan nga nahimutang kanhi.​—Gen 3:8; tan-awa ang ESPIRITU.

Si Jehova nga Diyos mao ang Maglalalang sa hangin. (Am 4:13) Bisan tuod sa literal wala diha niana (1Ha 19:11; itandi ang Job 38:1; 40:6; Sal 104:3), ang Diyos makahimo sa pagkontrolar sa hangin ug makagamit niini sa pagtuman sa iyang mga katuyoan, sama sa iyang paggamit niini ingong instrumento sa pagpahubas sa tubig sa Lunop. (Gen 8:1; Ex 14:21; Num 11:31; Sal 78:26; 107:​25, 29; 135:7; 147:18; Jer 10:13; Jon 1:4) Ang iyang Anak, sa dinhi pa sa yuta, nagpakita usab ug gahom sa pagkontrolar sa hangin, nga nagpalurang niini. (Mat 8:23-27; 14:24-32; Mar 4:36-41; 6:​48, 51; Luc 8:22-25) Dayag nga ubos lamang sa pagtugot ni Jehova nga si Satanas nakapatungha o nakakontrolar sa “usa ka makusog nga hangin” nga nakapahinabog kamatayon sa mga anak ni Job.​—Job 1:​11, 12, 18, 19.

Sagad ang hangin ginganlan pinasukad sa direksiyon nga gigikanan niini, busa ang “hangin nga timog” o hangin sa sidlakan gitawag sa ingon tungod kay kini mohuros pakasadpan gikan sa S. (Ex 10:​13, 19; Sal 78:26; Aw 4:16) Ang tanang upat ka direksiyon, A, H, S, ug K, nalangkob sa paghisgot sa “upat ka hangin” sa langit o sa yuta. (Jer 49:36; Eze 37:9; Dan 8:8; Mat 24:31) Sa Pinadayag 7:​1, ang “upat ka manulonda” gihulagway ingong “nagbarog diha sa upat ka suok sa yuta, nga hugot nga nagkupot sa upat ka hangin sa yuta.” Pinaagi sa pagbarog diha sa ‘mga suok,’ buhian sa ‘mga manulonda’ ang hangin gikan sa tanang direksiyon, nga tungod niana walay dapit sa yuta ang dili maapektohan sa malaglagong paghuros sa hangin.

Ang hangin nga amihan maoy bugnaw ug nagdalag kusog nga mga pag-ulan. (Job 37:9; Pr 25:23) Ang hangin nga habagat mohuros ibabaw sa init nga desyertong mga dapit paingon sa Palestina ug, busa, makapatunghag naglagiting nga kainit (Luc 12:55); ang mga unos mahimong magsugod usab sa H. (Isa 21:1; Zac 9:14) Sa panahon sa ting-init, ang hangin nga timog o hangin sa sidlakan, sa pagpaingon ngadto sa Ehipto ug Palestina, mohuros sa halapad nga desyertong mga dapit ug busa maoy init ug uga, nga magpagba o magpalaya sa katanoman. (Gen 41:​6, 23, 27; Eze 17:7-10; itandi ang Os 13:15; Jon 4:8.) Sa panahon sa ting-ulan, ang hangin nga kanaway o hangin sa kasadpan  magdalag umog ngadto sa Palestina gikan sa Dagat Mediteranyo ug magpaulan sa yuta. (1Ha 18:42-45) Sa dihang ang mga tig-obserbar makakitag dag-om nga mopatim-aw diha sa K, sila magdahom nga adunay bagyo. (Luc 12:54) Sa uga nga ting-init, ang matag adlaw nga mga huyohoy gikan sa Mediteranyo magpaarang-arang sa panahon.​—Tan-awa ang PANGANOD; EUROAQUILO.

Mahulagwayong Paggamit. Ang hangin kalit nga motungha ug kalit usab nga mawala, sa ingon tukmang maghawas sa pagkamubo sa kinabuhi sa tawo. (Job 7:7) Kay walay solidong substansiya, ang hangin mahimong magtumong sa kawang nga kahibalo ug kahago, sa walay-pulos nga mga pulong ug mga paglaom (Job 15:​1, 2; 16:3; Ecc 5:16; Os 12:1), ingon man usab sa pagkawalay-pulos. (Isa 26:18; 41:29; Jer 5:13) Maingon nga ang kawang nga mga buhat mosangko sa pagkawalay-pulos, ang pagpangagpas niini gipakasama sa “paggukod sa hangin.” (Ecc 1:14; 2:11) Ug ang tawo nga nagadalag pagkasinalikway diha sa iyang balay “magapanag-iya sa hangin.” Siya walay mabatonan nga bisan unsang mapuslanon o may tinuod nga bili.​—Pr 11:29.

Ang hangin magpatibulaag ug magpalagpot sa mga butang, ug busa ang ‘pagpatibulaag ngadto sa tanang hangin’ o “mabahin ngadto sa upat ka hangin” nagpasabot ug bug-os nga pagkatibulaag o pagkabahin. (Jer 49:36; Eze 5:10; 12:14; 17:21; Dan 11:4) Sama sa usa ka sakayan nga gituyatuya sa hangin, nga walay tinong direksiyon, ang mga tawo nga dili hamtong sa espirituwal mahimong ‘madala ngadto-nganhi sa matag hangin sa pagtulon-an pinaagi sa paglingla sa mga tawo, pinaagi sa kamalipatlipaton sa pagmugnag sayop.’​—Efe 4:​13, 14.