1. Anak nga lalaki ni Tera ug igsoon ni Abram (Abraham) ug Nahor. Si Haran nanganak kang Lot ug sa duha ka anak nga babaye, si Isca ug Milca; si Milca naminyo sa iyang uyoan nga si Nahor. Si Haran namatay sa wala pa si Tera ug Abram mobiya sa Ur sa mga Caldeanhon.​—Gen 11:​26-31.

2. Usa ka kaliwat ni Gerson pinaagi kang Simei; sa tribo ni Levi.​—1Cr 23:6-9.

3. Usa ka anak nga lalaki ni Caleb pinaagi sa iyang puyopuyo nga si Epa, ug siya “nanganak” kang Gazez; sa tribo ni Juda.​—1Cr 2:​3, 42, 46.

4. Usa ka siyudad sa amihanang Mesopotamia diin si Abram (Abraham) temporaryong mipuyo; dinhi namatay si Tera nga iyang amahan. (Gen 11:​31, 32; 12:​4, 5; Buh 7:2-4) Ang ngalang Haran usab daw naglakip sa naglibot nga dapit, kay ang Haran gitala nga lakip sa “mga nasod” nga nailog sa mga hari sa Asirya.​—2Ha 19:​11, 12.

Pipila ka panahon human mobiya sa Haran, si Abraham nagpadala sa iyang kinamagulangan nga alagad ngadto sa iyang mga paryente (lagmit nga nanimuyo sa Haran o sa usa ka duol nga lungsod, “sa siyudad ni Nahor”) aron sa pagpangitag pangasaw-onon alang sa iyang anak nga si Isaac. (Gen 24) Sa ulahi, si Jacob, ang apo nga lalaki ni Abraham, miadto sa Haran aron makaikyas sa kasuko sa iyang igsoong lalaki nga si Esau ug usab  aron sa pagpangitag asawa taliwala sa mga anak nga babaye sa iyang uyoan nga si Laban. (Gen 27:42-46; 28:​1, 2, 10) Diha sa usa ka atabay, dayag nga duol sa Haran, nahibalag ni Jacob si Raquel.​—Gen 29:4-12.

Sa ikawalong siglo W.K.P., si Haring Senakerib sa Asirya misulay sa paghadlok kang Haring Ezequias sa Juda pinaagi sa pagpadalag mga mensahe nga nanghambog nga gisakop sa iyang mga katigulangan ang Haran ug ang ubang mga dapit.​—2Ha 19:8-13; Isa 37:8-13.

Ang Asiryanhong mga reperensiya mopatim-awng naghisgot sa Haran ingong Harranu (nagkahulogang “Dalan”), tingali tungod kay kini anaa sa ruta sa nagapanaw nga mga panon ug naglangkit niini uban sa mga siyudad sa Nineve, Asur, Babilonya, ug Tiro, maingon man sa yuta sa Ehipto. (Itandi ang Eze 27:23.) Ang ngalan sa karaang siyudad napreserbar diha sa ngalan sa modernong Haran, nga nahimutang sa dapit diin ang duha ka lugot nag-usa aron mapormang usa ka sapa nga moabot sa Suba sa Balikh sa panahon sa tingtugnaw, mga 110 km (68 mi) sa ibabaw diin ang Balikh moagos ngadto sa Suba sa Euprates. Apan ang pipila nagtuo nga ang karaang dapit mismo nahimutang sa A sa modernong Haran. Ang pipila ka eskolar nakakitag pamatuod nga nanimuyo dinhi ang mga patriarka (ingon sa gihubit sa Bibliya) sanglit ang karaang mga ngalan sa mga dapit nga sakop niining lugara maoy sama sa personal nga mga ngalan nga makita sa Bibliya sama nianang kang Serug, Nahor, ug Tera.​—Gen 11:22-26.