Usa ka lubos-asul nga dili kaayo bililhong bato; sa Grego kini gitawag ug hy·aʹkin·thos. (Sa panguna kining pulonga nagtumong sa bulak nga ginganlag hyacinth, ug lagmit usab naghubit sa iris nga bulak nga lugom-asul.) Ang ika-11 nga patukoranang bato sa Bag-ong Jerusalem gihubit nga usa ka hasinto.​—Pin 21:20.

Ang kolor nga samag-hasinto kaasul (hyacinthine) maoy usa sa mga kolor nga gihubit maylabot sa mga panagang sa dughan sa kasundalohang mga mangangabayo diha sa Pinadayag 9:​16, 17. Ang mga panagang sa dughan nga gihisgotan dinhi lagmit mao ang gisul-ob sa mga mangangabayo. Ang mga kolor nga samag-kalayo kapula ug samag-asupre kadalag mao ang gihisgotang duha ka ubang mga kolor sa mga panagang sa dughan. Bahin sa ulahing gihisgotan maylabot sa mga kabayo nga nagbuga ug kalayo, aso, ug asupre, ang kolor nga samag-hasinto kaasul mahimong maghawas sa kadagtom sa aso, nga uban sa kalayo ug asupre, mahimong peligroso kaayo sa kinabuhi.