1. Apong lalaki ni Levi ug anak ni Kohat; katigulangan sa “mga anak nga lalaki ni Hebron” o sa mga Hebronhon.​—Ex 6:​16, 18; Num 3:​19, 27; 26:58; 1Cr 6:​2, 18; 15:​4, 9; 23:​12, 19; 26:30-32.

2. Ang anak nga lalaki ni Maresah ug amahan ni Kore, Tapua, Rekem, ug Sema; usa ka kaliwat ni Caleb sa tribo ni Juda.​—1Cr 2:​42, 43.

3. [Dapit sa Pakigkombuya].

Usa ka karaang siyudad sa bukirong rehiyon sa Juda nga gitukod pito ka tuig una pa ang Zoan sa Ehipto. (Num 13:22) Ang Hebron nahimutang mga 30 km (19 mi) sa HHK sa Jerusalem ug nag-umbaw nga 900 m (3,000 p) ibabaw sa lebel sa dagat. Nailhan kini ingong usa sa labing karaang mga dapit nga gipuy-an pa gihapon didto sa Tungang Sidlakan. Ang karaang ngalan sa Hebron nga “Kiriat-arba” (Lungsod ni Arba) lagmit naggikan sa Anakim nga magtutukod niini nga si Arba. (Gen 23:2; Jos 14:15) Ang siyudad ug ang kasikbit nga mga bungtod niini dugay nang nabantog sa ilang mga parasan, granada, igos, olibo, apricot, mansanas, ug mga nuwes. Kay daghan ug mga tubod ug mga atabay, ang Hebron gipalibotan sa nanganawkanaw nga berdeng katanoman.

Ang mga patriarkang si Abraham, Isaac, ug Jacob migugol ug pipila ka panahon sa ilang pagpuyo ingong langyaw didto sa Hebron. (Gen 13:18; 35:27; 37:​13, 14) Si Sara namatay didto ug gilubong sa usa  ka langob sa kasikbit nga dapit sa Makpela. Kini nga langob, lakip ang palibot nga yuta nga gipalit ni Abraham gikan sa Hitihanon nga si Epron, nahimong lubnganan sa pamilya, diin si Abraham, Isaac, Rebeca, Lea, ug Jacob gilubong usab.​—Gen 23:2-20; 49:29-33; 50:13.

Niadtong panahon nga si Moises nagpadalag 12 ka espiya ngadto sa Yutang Saad, ang samag higante nga mga kaliwat ni Anak nagpuyo sa Hebron. (Num 13:​22, 28, 33) Mga 40 ka tuig sa ulahi, si Hoham nga hari sa Hebron miduyog sa upat pa ka hari sa pagpakiggubat sa Gabaon, usa ka siyudad nga nakigdait kang Josue. Ang mga Israelinhon misanong sa pagpakitabang sa Gabaon ug, uban sa tabang ni Jehova, nagpildi sa mga kasundalohan sa lima ka hari nga misulong batok sa Gabaon. Human niadto kining lima ka hari, nga nagtago sulod sa usa ka langob, gipatay ug ang ilang patayng mga lawas gibitay diha sa mga estaka hangtod sa kahaponon.​—Jos 10:1-27.

Samtang nagpadayon ang pagpakiggubat sa Israel didto sa habagatang bahin sa Canaan, ang mga molupyo sa Hebron, lakip ang ilang hari (lagmit ang manununod ni Hoham), gitugyan sa kalaglagan. (Jos 10:​36, 37) Apan, bisan pag ang mga Israelinhon nga ubos ni Josue nakabuntog sa mga Canaanhon, mopatim-aw nga wala dayon sila makatukod ug mga garison aron padayong makontrolar ang mga dapit nga ilang nasakop. Dayag nga samtang ang Israel nakiggubat sa ubang dapit, ang mga Anakim mipuyo pag-usab sa Hebron, nga tungod niana kinahanglang ilogon ni Caleb (o sa mga anak sa Juda ubos sa pagpangulo ni Caleb) ang maong siyudad gikan sa ilang pagkontrolar human niadto. (Jos 11:21-23; 14:12-15; 15:​13, 14; Huk 1:10) Sa sinugdan kini gipahat ngadto kang Caleb sa tribo ni Juda, ug sa ulahi ang Hebron gihatagag sagradong posisyon ingong usa ka siyudad nga dalangpanan. Nagsilbi usab kini nga usa ka siyudad sa mga saserdote. Apan, “ang yuta sa siyudad [Hebron]” ug ang mga balangay niini maoy panulondon ni Caleb.​—Jos 14:​13, 14; 20:7; 21:9-13.

Didto sa Hebron, mga upat ka tuig sa ulahi, ang mga tawo sa Juda nagdihog kang David ingong hari. Siya naghari gikan didto sulod sa pito ka tuig ug tunga, nga sa maong panahon siya nanganak ug unom ka anak nga lalaki, si Amnon, Kileab (Daniel), Absalom, Adonias, Sepatias, ug Itream. (2Sa 2:1-4, 11; 3:2-5; 1Cr 3:1-4) Una pa niana, ang mga molupyo sa Hebron lagmit nga mitabang kang David sa dihang gigukod siya ni Haring Saul. (1Sa 30:​26, 31) Sa naghinapos ang paghari ni David didto sa Hebron, si Abner, ang pangunang tigpaluyo sa karibal nga hari nga si Is-boset nga anak nga lalaki ni Saul (2Sa 2:​8, 9), mitalikod dapig kang David. Sa dihang nahibalik gikan sa usa ka pagsulong ug sa pagkasayod nga si David nagpalakaw kang Abner diha sa pakigdait, si Joab nagsugo ug mga mensahero sa pagpabalik kang Abner ug dayon personal nga nagpatay kaniya didto sa Hebron, diin si Abner human niadto gilubong. (2Sa 3:12-27, 32) Sa ulahi, si Rekab ug Baana nagbuno kang Is-boset ug, kay nagdahom nga makadawat ug ganti, nagdala sa iyang ulo ngadto kang David didto sa Hebron, apan gisugo ni David nga sila patyon tungod sa ilang daotang gibuhat. (2Sa 4:5-12) Human niadto, si David gidihogan ingong hari sa tibuok Israel, ug iyang gibalhin ang iyang kaulohan gikan sa Hebron ngadto sa Jerusalem.​—2Sa 5:1-9.

Pipila ka tuig sa ulahi, ang anak nga lalaki ni David nga si Absalom mibalik sa Hebron ug iyang gisulayan ang pag-ilog sa pagkahari sa iyang amahan apan siya wala molampos. (2Sa 15:7-10) Lagmit nga tungod  sa pagkahinungdanon sa Hebron diha sa kasaysayan ingong kaulohan kanhi sa Juda, ug tungod kay mao kini ang siyudad nga iyang natawhan, gipili ni Absalom kining siyudara diin adto siya manukad sa iyang lakang sa pag-ilog sa trono. Sa ulahi, ang apong lalaki ni David, si Haring Rehoboam, nagtukod pag-usab sa Hebron. (2Cr 11:5-10) Human laglaga sa mga Babilonyanhon ang Juda ug human mamauli ang Hudiyong mga destiyero, ang pipila sa napasig-uling mga Hudiyo mipuyo sa Hebron (Kiriat-arba).​—Neh 11:25.