1. Usa sa mga Kristohanon sa kongregasyon sa Roma nga personal nga gipangomosta ni Pablo diha sa iyang sulat.​—Rom 16:14.

2. Usa ka Gregong diyos; ang anak nga lalaki ni Zeus pinaagi kang Maia. Si Hermes nailhan sa mga Romano nga mao si Mercury nga ilang diyos sa komersiyo. Si Hermes giisip ingong ang mensahero sa mga diyos. Siya gituohan nga mao ang maalamong magtatambag sa mga bayani ug giisip nga diyos sa komersiyo, sa pagkabatid manulti, sa katakos sa gimnastiko, sa pagkatulog, ug sa mga damgo. Gituohan nga kini nga diyos dili lamang naggiya sa mga buhi kondili nag-agak usab sa mga patay ngadto sa Hades.

Samtang si apostol Pablo didto sa Listra, ang lumad nga mga tawo, human makakita nga giayo sa apostol ang usa ka tawong bakol sukad sa iyang pagkahimugso, nagtuo nga si Pablo mao ang diyos nga si Hermes, sanglit si Pablo mao man ang “nanguna sa pagsulti.” (Buh 14:8-13) Kini nga pagtuo maoy kaharmonya sa ilang paghunahuna kang Hermes ingong mensahero sa mga diyos ug usa ka diyos sa pagkabatid manulti. Ang pamatuod nga si Hermes gisimba sa katawhan sa Listra makita sa mosunod nga inskripsiyon nga nakaplagan sa maong dapit niadtong 1909: “Si Toues Macrinus nga gitawag usab nga Abascantus ug si Batasis nga anak nga lalaki ni Bretasis nagpahimo, sumala sa usa ka panaad nga ilang kaugalingong gasto, [ug usa ka estatwa ni] Hermes nga Labing Bantogan ug usa ka sun-dial (o orasan) nga gipahinungod ngadto kang Zeus nga diyos-adlaw.”​—The International Standard Bible Encyclopaedia, giedit ni J. Orr, 1960, Tomo III, p. 1944.