[Sawang; Balangay].

1. Anak nga lalaki ni Ruben ug pangulo nga katigulangan sa “mga Hesronhon.”​—Gen 46:9; Ex 6:14; Num 26:4-6; 1Cr 5:3.

2. Anak nga lalaki ni Perez ug pangulo sa banay sa Judeanhong “mga Hesronhon”; katigulangan ni Haring David ug ni Jesu-Kristo. (Gen 46:12; Num  26:​20, 21; Ru 4:18-22; Mat 1:3; Luc 3:33) Sa edad nga 60, gipangasawa ni Hesron ang anak nga babaye ni Makir ug pinaagi kaniya siya nanganak kang Segub. (1Cr 2:21) Mopatim-aw nga ang iyang mga anak nga lalaki nga si Jerameel, Ram, ug Kelubai (Caleb) mas unang nangatawo.​—1Cr 2:​9, 18, 25.

Sumala sa mabasa sa 1 Cronicas 2:24 sa Masoretikong teksto, si Hesron namatay sa Caleb-eprata, ug human niini ang iyang nabalong asawa nga si Abias nanganak kang Ashur, ang amahan ni Tekoa. Apan gituohan sa ubang mga eskolar nga ang Masoretikong teksto wala magpreserbar sa orihinal nga sinulat, sanglit si Hesron gitala nga usa sa 70 ka “kalag sa balay ni Jacob nga miadto sa Ehipto” ug busa namatay gayod didto sa maong yuta (Gen 46:​12, 26, 27), ug alang kanila daw walay usa ka dapit sa Ehipto nga adunay Hebreohanong ngalan nga Caleb-eprata. Busa, daghang maghuhubad ang nagtul-id sa 1 Cronicas 2:24 aron mas mosibo sa mga sinulat sa Gregong Septuagint ug sa Latin nga Vulgate. Ang The Jerusalem Bible naghubad niini nga teksto: “Human mamatay si Hesron, si Caleb naminyo kang Eprata, ang asawa ni Hesron nga iyang amahan, kinsa nanganak kang Ashur, ang amahan ni Tekoa.” Ang hubad ni J. B. Rotherham mabasa: “Ug human mamatay si Hesron si Caleb miadto sa Eprata, ug ang asawa ni Hesron mao si Abia nga kaniya nanganak kang Ashur nga amahan ni Tekoa.” Busa, sumala niini nga mga kausaban, si “Ashur” mao ang “anak” ni Hesron pinaagi kang Abia (Abias) o kaha ang “anak” ni Caleb pinaagi kang Eprata.

3. Usa ka siyudad sa habagatang utlanan sa Juda nga nahimutang taliwala sa Kades-barnea ug Addar. (Jos 15:1-3) Apan ang samang asoy sa Numeros 34:4 wala magtala nga bulag ang Hesron ug Addar kondili mabasa nga “Hazar-addar,” nga nagpasabot nga ang Hesron, o Hazar, lagmit duol sa Addar, o kaha managsama ra nga dapit.​—Tan-awa ang ADDAR Num. 2.