Sa kapanahonan sa Bibliya, sama karong adlawa, ang mga kagamitan sa pagkatulog lainlaig matang, estilo, ug pagkagama, nga nagdepende sa bahandi, kahimtang sa kinabuhi, ug mga kostumbre sa mga tawo. Ang yuta mismo, nga usahay hanigan lamang ug banig, sagad igo na nga higdaanan sa kabos, tig-alimag hayop, ug sa  magpapanaw; ang mahalon kaayo ug dinayandayanan nga mga higdaanan maoy gigamit sa mga magmamando ug mga adunahan diha sa ilang permanenteng mga puloy-anan.

Ang komon nga Hebreohanong termino alang sa “higdaanan” maoy mish·kavʹ, gikan sa lintunganayng pulong nga sha·khavʹ (higda). (Gen 49:4; Lev 26:6) Ang kasagarang Grego nga termino maoy kliʹne, gikan sa kliʹno (hilig). (Mat 9:2; Luc 9:​58, Int) Ang laing Gregong termino alang sa “higdaanan,” ang koiʹte, nga sa panguna nagtumong sa usa ka dapit nga kahigdaan (Luc 11:7), gigamit usab sa pagtumong sa “higdaanan sa kaminyoon” (Heb 13:4) ug sa “ginadiling pakigdulog” (Rom 13:13); pinaagig paglarawan kini nagtumong sa pagpanamkon. (Rom 9:10) Ang ubang Hebreohanong mga termino alang sa higdaanan mao ang mit·tahʹ, ʽeʹres, ug ya·tsuʹaʽ. Ang Gregong kraʹbat·tos nagtumong sa usa ka teheras. (Mar 2:4) Ang mga magsusulat sa Bibliya wala kanunay maghimog kalainan tali niining nagkalainlaing mga termino ug sagad nga migamit ug dili lang kay usa ka termino alang sa parehong butang, nga nagtawag sa higdaanan ingong teheras (Mat 9:6; Mar 2:11) ug sa lain pang higdaanan ingong kama (Sal 6:6). Gigamit kini sa mga natulog sa gabii o nagpahulay sa kaudtohon (2Sa 4:5-7; Job 33:15), sa mga nagkasakit, sa mga nagsekso (Sal 41:3; Eze 23:17), ug ingong dapit-pahulayan sa patay sa usa ka halangdong lubnganan (2Cr 16:14). Ang batasan sa paghirag sa panahon sa pagpangaon nanginahanglan ug mga lingkoranan nga kahiragan. (Est 7:8; Mat 26:20; Luc 22:14) May usa ka matang sa lingkoranan nga gidisenyo ilabina sa pagdala sa usa ka tawo sa harianong paagi.​—Aw 3:7-10; tan-awa ang LINGKORANAN.

Ang pipila ka kagamitan sagad nga gilangkit sa mga higdaanan, sama pananglitan sa unlan. Si Jesus, sa dihang mitabok sa Dagat sa Galilea, nakatulog “nga nag-unlan” diha sa ulin sa sakayan. (Mar 4:38) Sa mas tugnaw nga yugto sa panahon usa ka “hinablon nga habol” o ubang pangbukot ang gamiton (Isa 28:20), apan naandan nga matulog ginamit ang pang-adlaw-adlaw nga mga besti; mao nga ang Moisesnong Balaod nagdili nga huptan ang mga besti sa laing tawo human sa pagsalop sa adlaw: “Kini lamang ang iyang besti. . . . Unsa may iyang isul-ob paghigda?”​—Ex 22:​26, 27.

Ang mga higdaanan sa Sidlakan sagad maoy yano nga banig nga hinimo sa uhot o tikog, nga tingali gihanigan ug samag kutson aron komportable higdaan. Kon dili gamiton, kini lukoton ug hiposon. Ang usa ka mas permanenteng higdaanan gigamitan ug kahoyng bayanan nga magpakawan sa natulog gikan sa yuta o sa salog. (Mar 4:21) Kini nagsilbing mga lingkoranan o mga higdaanan nga mahimong lingkoran sa maadlaw. Ang kinayanohang samag teheras nga mga higdaanan maoy gaan, sayon alsahon ug bitbiton.​—Luc 5:​18, 19; Ju 5:8; Buh 5:15.

Ang mga adunahan may mga higdaanan nga giadornohan ug eleganteng mga dekorasyon nga daghag borda. “Gihapinan ko ug mga kobrekama ang akong higdaanan, sa daghag-bulok nga mga butang, sa lino sa Ehipto. Giwisikan ko ang akong higdaanan sa mira, mga aloe ug kaningag,” mipahayag ang mahayloon nga pampam. (Pr 7:​16, 17) Sama sa “mga higdaanang ginama sa bulawan ug sa plata” sa usa ka palasyo sa Persia, ingon man usab sa “halangdong lingkoranan,” sa “higdaanan nga gikan sa Damasco,” ug sa “mga higdaanan nga garing,” sa ingon gihubit sa manalagna ang mga kagamitan sa rebelyosong Israel.​—Est 1:6; Am 3:12; 6:4.

Ang may ikasarang sa pagtukod ug dagkong mga balay adunay iyaiyang mga lawak-katulganan o sulod nga mga lawak-katulganan. (Ex 8:3; 2Ha 6:12; 11:2) Sa panahon sa ting-init, ang bugnaw nga mga atop sagad nga gigamit ingong mga katulganan.

Dugang pa, sa mahulagwayong diwa ang mga higdaanan gihisgotan diha sa Kasulatan. Pananglitan, ang kahimtang sa patay nahisama niadtong naghigda sa higdaanan. (Job 17:13; Eze 32:25) Ang mga maunongon kang Jehova ‘mohugyaw sa kalipay diha sa ilang mga higdaanan,’ nga kasukwahi sa mga sukihan nga motiyabaw ug maglaraw ug daotan samtang naghigda sa higdaanan. (Sal 149:5; Os 7:14; Miq 2:1) Dili sama kang Ruben, kinsa tungod sa pagkamahinaykon nakighilawas sa puyopuyo sa iyang amahan nga si Jacob ug niini nga diwa naghugaw sa higdaanan sa iyang amahan (Gen 35:22; 49:4), ang mga Kristohanon kinahanglang dili maghugaw sa sagradong kahikayan sa kaminyoon, “ang higdaanan sa kaminyoon,” sa bisan unsang paagi.​—Heb 13:4.