[Gr., orʹnis].

Sa Hebreohanong Kasulatan wala hisgoti sa dayag ang binuhing manok (Gallus domesticus), apan sa Kristohanon Gregong Kasulatan si Jesu-Kristo naghisgot sa himungaan nga nagtigom sa mga piso niini ilalom sa mapanalipdanong mga pako niini diha sa iyang pagtandi maylabot sa iyang tinguha nga tigomon ang dili-masanongong Jerusalem. (Mat 23:37; Luc 13:34) Ang Gregong pulong (orʹnis) nga gigamit dinhi maoy komon nga termino ug busa lagmit nagtumong sa bisan unsang langgam, ihalas o binuhi. Apan sa Attic nga Grego kini sagad nagkahulogang himungaan, sanglit kini mao ang labing komon ug mapuslanon sa binuhing mga langgam. Ang paghisgot ni Jesus sa usa ka anak nga nangayog itlog gikan sa iyang amahan (Luc 11:​11, 12) nagpaila nga ang binuhing himungaan maoy komon diha sa Palestina sa maong panahon. (Tan-awa ang SUNOY.) Gikan sa Gregong pulong nga orʹnis (genitive: orʹni·thos) mitungha ang pulong nga “ornitolohiya,” ang sanga sa zoolohiya nga nagtuon sa mga langgam.

Ang pipila ka rabbinikong mga balaod nagdili sa pagkaon sa mga itlog nga gipangitlog panahon sa adlawng Igpapahulay, sanglit giisip nga kini maoy pagtrabaho sa bahin sa himungaan; apan, ang pipila nagtugot sa pagkaon sa mga itlog kon ang himungaan gibuhi aron kaonon ug dili aron paitlogon. (Babilonyanhong Talmud, Bezah 2a, b) Apan, ang Bibliya walay mga balaod nga ingon niana.