Sagad usa ka butang nga may bili nga ihatag aron impluwensiyahan ang modawat niini sa paglihok, sagad sa dili-minatarong o sa dinaotan nga paagi, alang sa kaayohan sa naghiphip. Depende sa konteksto, ang Hebreohanong pulong alang sa hiphip (shoʹchadh) mahimong hubaron usab nga “gasa” o “regalo.” (Ex 23:​8, ftn sa Rbi8; 1Ha 15:19; Pr 17:8) Ang Kasulatan nagpaila nga ang pagdawat ug mga hiphip motultol dili lamang sa pagtuis sa hustisya kondili usab sa pag-ula ug dugo.​—Deu 16:19; 27:25; Eze 22:12.

Ang pagdawat ug mga hiphip espesipikong gidili sa balaod sa Diyos ngadto sa Israel, ug si Jehova, ingong ang Supremong Maghuhukom, nagpakitag hingpit nga panig-ingnan sa paghatag kanunay ug dili-mapihigong mga desisyon ug dili gayod modawat ug mga hiphip. (Ex 23:8; 2Cr 19:7) Busa, kadtong buot nga mahimong mga dinapit sa tolda ni Jehova kinahanglang mosundog kaniya niining bahina.​—Sal 15:​1, 5; tan-awa usab ang Isa 33:​15, 16.

Ang Bibliya naundan sa daghang pananglitan niadtong kinsa midawat ug hiphip. Si Delila gihiphipan aron sa pagbudhi kang Samson, nga ang matag usa sa magkaabin nga mga ginoo sa mga Filistehanon nagbayad ug 1,100 ka pirasong plata ($2,422, kon ang “pirasong plata” maoy mga siklo). (Huk 16:5) Ang mga anak nga lalaki ni Samuel nga manalagna ug maghuhukom, dili sama sa ilang amahan, midawat ug mga hiphip ug mituis sa paghukom. (1Sa 8:3; 12:3) Si David naghisgot niadtong kansang tuo nga kamot, nga angay untang magpaluyo sa kawsa sa matarong, napuno sa panghiphip. (Sal 26:10) Si Haring Asa ug si Haring Ahaz naghiphip sa hari sa Sirya ug sa hari sa Asirya alang sa militaryong tabang. (1Ha 15:​18, 19; 2Ha 16:8) Ang mga pangulo, o mga prinsipe, sa dili-matinumanong Jerusalem nahimong mga mahigugmaon sa mga hiphip. (Isa 1:23; 5:23; Miq 3:11) Dili sama sa ordinaryong mga pampam nga nagdawat ug suhol, ang dili-matinumanong Jerusalem sa pagkatinuod naghiphip sa uban aron moanha kaniya.​—Eze 16:33.

Sa unang siglo K.P., si Judas Iskariote midawat ug hiphip aron sa pagbudhi kang Jesu-Kristo (Mat 26:14-16, 47-50), ug si Gobernador Felix naghikaw sa hustisya sa kaso ni Pablo sa paglaom nga makadawat ug hiphip gikan sa apostol.​—Buh 24:​26, 27.

Ang mga ekspresyong “hiphip gikan sa sabakan” ug “hiphip diha sa sabakan” mas masabtan kon tagdon nga ang Hebreohanong pulong alang sa “sabakan” mahimong magtumong usab sa pilo sa usa ka besti ibabaw sa bakos. Busa, kini nga mga ekspresyon nagpaila nga ang hiphip dayag nga gitago diha sa ibabaw nga pilo sa besti ug dayon sekretong gihatag ngadto sa laing tawo kinsa nagtago usab niini sa samang paagi.​—Pr 17:23; 21:14; tan-awa ang GASA, REGALO.