Sagad usa kini ka furuncle, ang masakit nga paghuboy sa panit diha sa usa ka bahin sa lawas, dili tungod sa pagkasamad, kondili tungod sa impeksiyon pinaagi sa bakterya nga miatake sa mga tinuboan sa balhibo o sa mga glandula sa singot o sa sebaceous; sa Hebreohanon kini maoy shechinʹ. Magsugod ingong pulahong butoybutoy, sa ulahi ang hubag magnana ug, sa kataposan, motungha ang gahion nga uyok niini. Usahay, daghang hubag ang motubo sa usa ka apektadong bahin. Ang carbuncle, hubag nga daghag mata, mas peligroso kay sa furuncle, hubag nga usa rag mata, kay kini mas dako, usahay mas ngutngot, ug lagmit inubanan sa mga simtoma sama sa paglabad sa ulo, hilanat, ug pagkaluya. Usahay kini makamatay.

Sa panahon sa ikaunom nga hampak ni Jehova batok sa Ehipto, ang mga Ehiptohanon ug ang ilang mga hayop gihampak pinaagig masakit nga “mga hubag nga mamuto.” (Ex 9:8-11) Lagmit nga kini maoy grabeng mga hubag sa panit nga nagnangnang, ug kining matanga sa mga hubag mahimong molukop sa dakong bahin sa lawas. Bisan pa niana, sanglit daklit lamang ang paghubit niini nga sakit diha sa Kasulatan, imposibleng matino kon unsang espesipiko nga sakit kini sa modernong adlaw.

Ang mga Israelinhon gipasidan-an nga ang mga sangpotanan sa pagkadili-masinugtanon sa Diyos maglakip sa iyang paghampak kanila ug “mga hubag sa Ehipto.” Dugang pa nga giingon: “Si Jehova maghampak kanimo pinaagi sa grabeng hubag [Heb., bish·chinʹ raʽ] diha sa duha nimo ka tuhod ug sa duha nimo ka bitiis, nga gikan niana ikaw dili na maayo, gikan sa lapalapa sa imong tiil hangtod sa imong alimpulo.”​—Deu 28:​15, 27, 35.

Gipakita sa Balaod nga ang naayo nga hubag lagmit tugkan ug sanla o pat-ak. Sa pipila ka kahimtang, ingon niana ang mga simtoma mao nga ang biktima ipahayag dayon nga mahugaw ug sanlahon; sa ubang kaso, ang pito ka adlaw nga pagkuwarentinas ipatuman. Human niana kon makaplagan nga ang sakit wala mokanap, kini ipaila nga mao lamay “paghuboy sa hubag” ug ang saserdote magpahayag nga ang maong tawo mahinlo.​—Lev 13:18-23.

Gihampak ni Satanas si Job “pinaagig grabeng mga hubag [Heb., bish·chinʹ raʽ] gikan sa lapalapa sa iyang tiil hangtod sa iyang alimpulo.” (Job 2:7) Ang espesipikong medikal nga ngalan sa sakit nga giantos ni Job dili matino. Tungod sa hilabihang kasakit, si Job nagkagis sa iyang kaugalingon pinaagig bika. (Job 2:8) Ang iyang unod naputos sa mga ulod, ang iyang panit nagkugankugan (Job 7:5), makaluod ang iyang gininhawa (Job 19:17), siya nag-antos sa kaul-ol, ug ang iyang panit nangitom ug nangapaksit (Job 30:​17, 30).

Si Haring Ezequias sa Juda gitugkan ug hubag ug “nasakit nga himalatyon na.” Sa pagsunod sa gisulti ni Isaias, ang usa ka tinapay sa pinisa nga pinaugang mga igos gihampol sa hubag, ug human niana si Ezequias inanayng naulian. (2Ha 20:​1, 7; Isa 38:​1, 21) Hinunoa, ang iyang pagkaayo dili tungod sa kinaiyanhong pagkaayo lamang, kondili tungod kini sa pag-ayo ni Jehova kaniya.​—2Ha 20:5.